முகக்கவசம் அணிவது குறித்து மாநில அரசுகளே முடிவெடுக்கலாம்: மத்திய சுகாதாரத் துறை இணை அமைச்சா்

கரோனா பரவல் தடுப்பு முகக்கவசம் அணிவது குறித்த முடிவை அந்தந்த மாநில அரசுகளே தீா்மானிக்கலாம் என மத்திய சுகாதாரம், குடும்ப நலத் துறை இணை அமைச்சா் பிரதாப் ராவ் ஜாதவ் கூறினாா்.

சா்வதேச யோகா தினம் ஜூன் 21-ஆம் தேதி நடைபெறுவதையொட்டி, முன்னோட்ட யோகா தின நிகழ்ச்சி புதுச்சேரி கடற்கரைச் சாலை காந்தி சிலை திடலில் செவ்வாய்க்கிழமை காலை நடைபெற்றது. புதுவை முதல்வா் என்.ரங்கசாமி தலைமை வகித்தாா். துணைநிலை ஆளுநா் கே.கைலாஷ்நாதன் யோகா பயிற்சியை தொடங்கி வைத்தாா்.

நிகழ்ச்சியில் பங்கேற்ற மத்திய இணை அமைச்சா் பிரதாப் ராவ் ஜாதவ் பின்னா் செய்தியாளா்களிடம் கூறியதாவது: யோகா என்பது நாட்டின் பாரம்பரிய கலையாகும். அதை சா்வதேச அளவில் எடுத்துச் சென்றவா் பிரதமா் நரேந்திர மோடி. நாட்டில் கரோனா பரவலை மத்திய சுகாதாரத் துறை தீவிரமாகக் கண்காணித்து வருகிறது. ஆனால், முகக்கவசம் அணிய வேண்டும் என மத்திய அரசு அறிவுறுத்தவில்லை. கரோனா பரவல் நிலைக்கு ஏற்ப, அந்தந்த மாநில அரசுகளே முகக்கவசம் அணிவது குறித்து முடிவெடுக்கலாம் என்றாா்.

முன்னதாக, அவா் யோகா பயிற்சி நிகழ்ச்சியில் பேசியதாவது: நமது அன்றாட வாழ்வில் ஏற்படும் மன அழுத்தத்தை சீராக்கும் வகையில் யோகக் கலை உள்ளது. இதை அனைவரும் தினமும் கடைப்பிடிப்பது அவசியம். அதன்மூலம் நாம் புத்துணா்வுடன் செயல்பட முடியும் என்றாா்.

கடற்கரை காந்தி சிலை முன் தரையில் அமா்ந்து துணைநிலை ஆளுநா் கே.கைலாஷ்நாதன், மத்திய இணை அமைச்சா் பிரதாப் ராவ் ஜாதவ், பேரவைத் தலைவா் ஆா்.செல்வம், தலைமைச் செயலா் சரத் சௌகான் உள்ளிட்டோா் யோகப் பயிற்சி மேற்கொண்டனா்.

துணைநிலை ஆளுநா்: யோகா பயிற்சியைத் தொடங்கி வைத்து துணைநிலை ஆளுநா் கே.கைலாஷ்நாதன் பேசியதாவது: ஐக்கிய நாடுகள் சபை சா்வதேச யோகா தினத்தை அறிவிப்பதற்கு முன்பே புதுவையில் யோகா பயிற்சி நடைபெற்று வருகிறது. யோகா நமது தொன்மையான கலையாகும். பல்லாயிரம் ஆண்டுகளாக யோகா கலையை நமக்காக நமது முன்னோா் பாதுகாத்துள்ளனா். பல நாடுகள் யோகாவை பாடத் திட்டமாக்கியுள்ளன. யோகா குறித்த விழிப்புணா்வை சமூகத்தில் ஏற்படுத்த வேண்டும் என்றாா்.

முதல்வா் என்.ரங்கசாமி: புதுவை முதல்வா் என்.ரங்கசாமி பேசியதாவது: உடல் ஆரோக்கியத்தையும், மன அமைதியையும் ஒருசேர யோகா கலை மூலம் பெறலாம். நிகழாண்டில் சா்வதேச யோகா தினம் ‘ஒரே பூமி, ஒரே ஆரோக்கியம்’ எனும் பொருளுடன் நடைபெறவுள்ளது. புதுவை மாநிலத்தில் ஆரம்ப சுகாதார நிலையங்களுக்கு வருவோருக்கும், பள்ளி மாணவா்களுக்கும் யோகா பயிற்சி அளிக்கப்படுகிறது. அனைத்து நிலைகளிலும் யோகாவை கற்றுத்தர அரசு நடவடிக்கை மேற்கொண்டுள்ளது என்றாா்.

கடற்கரைச் சாலையில் மேரி கட்டடம் முதல் தலைமைச் செயலகம் வரை சுமாா் 6,000 போ் யோகா பயிற்சியில் ஈடுபட்டனா். மத்திய ஆயுஷ் இயக்கக இணை இயக்குநா் மோனலிச தாஸ் வரவேற்றாா்.

தொடக்க நிகழ்ச்சியில் அமைச்சா் க.லட்சுமி நாராயணன், சு.செல்வகணபதி எம்.பி. ஆகியோா் பங்கேற்றனா்.