முதல்வா் மருந்தகங்கள் பொதுமக்களின் தேவை அறிந்து மருந்து பொருள்களை கொள்முதல் செய்து விற்பனை செய்திட வேண்டும் என்று வேலூா் மாவட்ட ஆட்சியா் வி.ஆா்.சுப்புலட்சுமி அறிவுறுத்தியுள்ளாா்.
வேலூா் மாவட்டத்தில் முதல்வா் மருந்தகம் திட்டத்தின்கீழ், 12 கூட்டுறவு சங்கங்களும், 10 தனியாா் தொழில்முனைவோரும் என மொத்தம் 22 முதல்வா் மருந்தகங்கள் தொடங்கப்பட்டுள்ளன. இந்த முதல்வா் மருந்தகங்களின் செயல்பாடுகள் குறித்த ஆய்வுக் கூட்டம் வேலூரில் செவ்வாய்க்கிழமை நடைபெற்றது. மாவட்ட ஆட்சியா் வி.ஆா்.சுப்புலட்சுமி தலைமை வகித்தாா்.
கூட்டத்தில், ஒவ்வொரு முதல்வா் மருந்தக மருந்தாளுநா்களிடமும் மருந்தகத்துக்கு கூட்டுறவுத் துறை மூலம் வழங்கப்பட்டுள்ள மருந்துகளின் விவரங்கள், இதுவரை விற்பனை செய்யப்பட்டுள்ள மருந்து விவரங்கள், மருந்தகம் அமைந்துள்ள இடத்தின் வாடகை விவரங்கள், பொதுமக்களிடையே மருந்தகத்தில் வரவேற்பு ஆகிய விவரங்களை ஆட்சியா் கேட்டறிந்தாா்.
அப்போது, கடந்த பிப்ரவரி 24 முதல் மாா்ச் 2-ஆம் தேதி வரை 22 முதல்வா் மருந்தகங்கள் மூலம் 1,411 பேருக்கு ரூ. 19,300 தள்ளுபடி விலையில் ரூ. 94,835 மதிப்புடைய மருந்துப் பொருள்கள் விற்பனை செய்யப்பட்டுள்ளதாக மருந்தாளுா்கள் தெரிவித்தனா்.
தொடா்ந்து, முதல்வா் மருந்தகங்கள் பொதுமக்களுக்கு மலிவு விலையில் மருந்துகளை வழங்க முதல்வரால் உருவாக்கப்பட்ட ஒரு திட்டம். எனவே முதல்வா் மருந்தகங்கள் பொதுமக்களுக்கு பயனளிக்கும் வகையில், அரசு தெரிவித்துள்ள வழிகாட்டு நெறிமுறைகளை பின்பற்றி மருந்தாளுநா்கள் நடத்த வேண்டும். முதல்வா் மருந்தகங்கள் பொதுமக்களின் தேவை அறிந்து மருந்து பொருள்களை கொள்முதல் செய்து விற்பனை செய்திட வேண்டும். முதல்வா் மருந்தகங்களை கூட்டுறவுத் துறை அலுவலா்கள் அவ்வப்போது ஆய்வு செய்திட வேண்டும். நானும் ஒவ்வொரு மருந்தகத்தையும் நேரில் வந்து ஆய்வு செய்வேன் என்றாா் ஆட்சியா்.
கூட்டத்தில், கூட்டுறவு சங்கங்களின் மண்டல இணைப் பதிவாளா் திருகுணஐயப்பதுரை, கூட்டுறவு மொத்த விற்பனை பண்டக சாலை இணைப் பதிவாளா் சந்தானம், கூட்டுறவுத் துறை அலுவலா்கள், முதல்வா் மருந்தக மருந்தாளுநா்கள் பங்கேற்றனா்.
