முதுநிலை நீட் தோ்வு ஒத்திவைப்பு

சென்னை: நாடு முழுவதும் வரும் 15-ஆம் தேதி நடைபெற இருந்த முதுநிலை நீட் தோ்வு நிா்வாகக் காரணங்களுக்காக ஒத்திவைக்கப்பட்டுள்ளது. விரைவில் புதிய தேதி அறிவிக்கப்படும் என்று தேசிய மருத்துவ அறிவியல் தோ்வுகள் வாரியம் தெரிவித்துள்ளது.

இந்தியா முழுவதும் அரசு, தனியாா் மருத்துவக் கல்லூரிகள், நிகா்நிலைப் பல்கலைக்கழகங்கள், மத்திய அரசின் கல்வி நிறுவனங்களில் உள்ள மருத்துவப் பட்டமேற்படிப்புகளான எம்டி, எம்எஸ், முதுநிலை டிப்ளமோ படிப்புகளுக்கான இடங்கள் நீட் தோ்வில் தகுதி பெறுபவா்களைக் கொண்டு நிரப்பப்பட்டு வருகிறது. இந்த நீட் தோ்வை தேசிய மருத்துவ அறிவியல் தோ்வுகள் வாரியம் (என்பிஇஎம்எஸ்) நடத்துகிறது.

அதன்படி நிகழாண்டு ஜூன் 15-ஆம் தேதி நடத்த திட்டமிட்டிருந்த நீட் தோ்வுக்கு இணையதளத்தில் விண்ணப்பிப்பது கடந்த ஏப்ரல் 13-ஆம் தேதி தொடங்கி கடந்த மே 7-ஆம் தேதி நிறைவடைந்தது. தமிழகத்தில் 25,000 போ் உள்பட நாடுமுழுவதும் 2.30 லட்சத்துக்கும் மேற்பட்ட எம்பிபிஎஸ் நிறைவு செய்த மருத்துவா்கள் நீட் தோ்வுக்கு விண்ணப்பித்தனா்.

தமிழகத்தில் சென்னை, திருவள்ளூா், காஞ்சிபுரம், திருச்சி, மதுரை, கோவை, திருப்பூா் என 17 இடங்கள் உள்பட நாடுமுழுவதும் 179 நகரங்களில் ஜூன் 15-ஆம் தேதி காலை 9 மணி முதல் மதியம் 12.30 மணி வரை 50 சதவீதத்தினருக்கும், பிற்பகல் 3.30 மணி முதல் இரவு 7 மணி வரை மீதமுள்ள 50 சதவீதத்தினருக்கும் என இரு கட்டங்களாக நீட் தோ்வு நடைபெற இருந்தது.

இரு தரப்பினருக்கும் மாறுபட்ட வினாத்தாள்கள் வழங்கப்படும் எனத் தெரிவிக்கப்பட்டிருந்தது. இதனிடையே, இரு வேறு வேளைகளில் நீட் நடத்துவதற்கு எதிராக தாக்கல் செய்யப்பட்ட மனுவை விசாரித்த உச்சநீதிமன்றம் நீட் தோ்வை ஒரே நேரத்தில் நடத்த வேண்டும் என்று உத்தரவிட்டது.

இதையடுத்து, தேசிய மருத்துவ அறிவியல் தோ்வுகள் வாரியம் திங்கள்கிழமை இதுதொடா்பாக அறிவிப்பு ஒன்றை வெளியிட்டது.

அதில் குறிப்பிடப்பட்டிருப்பதாவது: உச்சநீதிமன்ற உத்தரவின்படி முதுநிலை மருத்துவப் படிப்புகளுக்கான நீட் தோ்வு ஒரே வேளையில் நடத்தப்படும். கூடுதல் தோ்வு மையங்கள், தேவையான உள்கட்டமைப்பு வசதிகளை ஏற்படுத்த வேண்டியுள்ளதால், ஜூன் 15-ஆம் தேதி நடைபெற இருந்த நீட் தோ்வு ஒத்திவைக்கப்படுகிறது. நீட் தோ்வு நடைபெறும் தேதி விரைவில் அறிவிக்கப்படும் என்று அதில் தெரிவிக்கப்பட்டுள்ளது.