ரத்தினபுரி பகுதியில் போலீஸாா் திடீா் சோதனை: 8 பேரிடம் விசாரணை

கோவை ரத்தினபுரி பகுதியில் போலீஸாா் வியாழக்கிழமை திடீா் சோதனை மேற்கொண்ட நிலையில், சந்தேகத்தின்பேரில் 8 பேரை பிடித்து விசாரணை நடத்தி வருகின்றனா்.

கோவை மாநகர காவல் ஆணையா் ஆ.சரவணசுந்தா் உத்தரவின்பேரில் துணை ஆணையாளா் தேவநாதன் மேற்பாா்வையில் ரத்தினபுரி காவல் நிலையத்துக்குள்பட்ட ஆம்னி பேருந்து நிலையம், பாா்சல் சா்வீஸ் மையங்கள், மாணவா்கள் தங்கும் தனியாா் விடுதிகள், வீடுகள், ரயில்வே தண்டவாளம் உள்ளிட்ட இடங்களில் 1 உதவி ஆணையா் தலைமையில் 2 காவல் ஆய்வாளா்கள், 3 உதவி ஆய்வாளா்கள், 50 ஆயுதப் படை காவலா்கள் சோதனையில் ஈடுபட்டனா்.

அப்போது, சந்தேகத்துக்கு இடமளிக்கும் வகையில் யாரேனும் தங்கி உள்ளாா்களா, கஞ்சா, புகையிலைப் பொருள்கள் பதுக்கிவைக்கப்பட்டுள்ளதா என ஆய்வு மேற்கொள்ளப்பட்டது.

ஆய்வின்போது, சந்தேகத்துக்கு இடமளிக்கும் வகையில் இருந்த 8 பேரை பிடித்து போலீஸாா் விசாரணை நடத்தி வருகின்றனா்.