பல்லவன், வைகை உள்ளிட்ட 10-க்கும் மேற்பட்ட ரயில்கள் இன்று ரத்து!
இந்தியா-பிரான்ஸ் இடையே பொருளாதாரம் மற்றும் வா்த்தக உறவுகளை மேம்படுத்துவதில் இரு நாடுகளும் கவனம் செலுத்தி வருகிறது என அந்நாட்டு வெளியுறவு மற்றும் வா்த்தகத் துறை அமைச்சா் சோஃபி பிரைமாஸ் தெரிவித்தாா்.
மூன்று நாள் பயணமாக கடந்த புதன்கிழமை இந்தியா வந்த சோஃபி பிரைமஸ், பயணத்தின் முடிவில் தில்லியில் நடைபெற்ற செய்தியாளா்கள் சந்திப்பில் கூறியதாவது:
பாதுகாப்புத் துறையில் நெருங்கிய நட்புறவைக் கொண்டுள்ள இந்தியா-பிரான்ஸ் இடையே பொருளாதாரம் மற்றும் வா்த்தக உறவுகளை மேம்படுத்துவதில் இரு நாடுகளும் தற்போது கவனம் செலுத்தி வருகின்றன. குறிப்பாக தூய எரிசக்தி, புதிய தொழில்நுட்பங்கள் மற்றும் விமான போக்குவரத்து போன்ற துறைகளில் இந்தியா வேகமாக வளா்ந்து வருகிறது.
இந்திய பிரதமா் நரேந்திர மோடி மற்றும் பிரான்ஸ் அதிபா் இமானுவல் மேக்ரான் ஆகியோருக்கு இடையேயான விரிவான பேச்சுக்களைத் தொடா்ந்து உருவாக்கப்பட்ட ‘பிரான்ஸ்-இந்தியா 2047’ ஒத்துழைப்பு ஒப்பந்தம் இருதரப்பின் உறவை மேலும் வலுப்படுத்தும்.
இந்தியா-ஐரோப்பிய யூனியன் இடையே சுதந்திர வா்த்தக ஒப்பந்தப் பேச்சுவாா்த்தைகள் மீண்டும் கடந்த ஜூன் மாதம் தொடங்கின. இருப்பினும், காா்பன் வரி மீதான ஐரோப்பிய யூனியனின் நிலைப்பாடு உள்ளிட்ட பல்வேறு சவால்களால் இந்த ஒப்பந்தத்தில் முன்னேற்றம் ஏற்படவில்லை.
இந்தியா-மத்திய கிழக்கு-ஐரோப்பா பொருளாதார வழித்தட திட்டத்தின்கீழ் சவூதி அரேபியா, இந்தியா, அமெரிக்கா மற்றும் ஐரோப்பாவில் சாலைகள், ரயில் பாதைகள் மற்றும் கப்பல் வழித்தட இணைப்பை உருவாக்குவதன் மூலம் வா்த்தக உறவு மற்றும் பிராந்திய ஒருங்கிணைப்பை மேலும் மேம்படுத்த முடியும் என்றாா்.
