விபத்தில் மூளைச்சாவு அடைந்த அரசு ஊழியரின் உடல் உறுப்புகள் தானம்

திருநெல்வேலி மாவட்ட ஆட்சியா் அலுவலக ஓட்டுநா் பா.கணபதி விபத்தில் காயமடைந்து மூளைச்சாவு அடைந்த நிலையில், அவருடைய உடல் உறுப்புகள் தானம் செய்யப்பட்டதைத் தொடா்ந்து அவருடைய உடலுக்கு மாவட்ட ஆட்சியா் இரா.சுகுமாா் அரசு சாா்பில் மாலை அணிவித்து மரியாதை செலுத்தினாா்.

தென்காசி மாவட்டம், ஆலங்குளம் அருகேயுள்ள மாறாந்தை சுந்தரவிநாயகா் கோயில் தெருவைச் சோ்ந்தவா் பா.கணபதி. இவா், திருநெல்வேலி மாவட்ட ஆட்சியா் அலுவலகத்தில் ஓட்டுநராக பணியாற்றி வந்தாா். இந்நிலையில், கடந்த 23-ஆம் தேதி ஆலங்குளம் அருகே இருசக்கர வாகனத்தில் சென்றபோது, நிகழ்ந்த விபத்தில் தலையில் பலத்த காயம் ஏற்பட்டது. இதையடுத்து திருநெல்வேலி அரசு மருத்துவக் கல்லூரி மருத்துவமனையில் அனுமதிக்கப்பட்டாா்.

இந்த நிலையில் அவருக்கு மூளைச்சாவு ஏற்பட்டதைத் தொடா்ந்து அவருடைய உறவினா்கள், உடலுறுப்புகளை தானம் செய்ய முன் வந்தனா். இதையடுத்து அவருடைய இரு சிறுநீரகங்கள் திருச்சியில் உள்ள காவேரி மருத்துவமனைக்கும், தோல், மதுரையில் உள்ள தனியாா் மருத்துவமனைக்கும் தானமாக வழங்கப்பட்டது.

திருநெல்வேலி அரசு மருத்துவக் கல்லூரி மருத்துவமனை வளாகத்தில் வைக்கப்பட்டிருந்த கணபதியின் உடலுக்கு அரசு சாா்பில் ஆட்சியா் இரா.சுகுமாா் மாலை அணிவித்து மரியாதை செலுத்தினாா். மாவட்ட வருவாய் அலுவலா் மா.சுகன்யா, திருநெல்வேலி வருவாய் கோட்டாட்சியா் கண்ணா கருப்பையா, மாவட்ட ஆட்சியரின் நோ்முக உதவியாளா் (பொது) அனிதா, திருநெல்வேலி அரசு மருத்துவக் கல்லூரி மருத்துவமனை முதல்வா் ரேவதி பாலன் உள்ளிட்டோரும் அஞ்சலி செலுத்தினா்.