``விருந்து சாப்பிடும் மத்திய குழுவினர் மொய் வைப்பதில்லை..'' - குறைதீர் கூட்டத்தில் சாடிய விவசாயி!

தஞ்சாவூர், கலெக்டர் அலுவலகத்தில் விவசாயிகள் குறைதீர் கூட்டம், கலெக்டர் பிரியங்கா பங்கஜம் தலைமையில் நடந்தது. இதில் விவசாய சங்கத்தை சேர்ந்தவர்கள், விவசாயிகள் உள்ளிட்ட பலர் கலந்து கொண்டனர்.

கூட்டம் தொடங்கியதும், 100 நாள் வேலைத் திட்டத்தில் மத்திய அரசு நிதி வழங்காததால், கடந்த நான்கு மாதமாக சம்பளம் வழங்கப்படவில்லை. இதனால் விவசாயத் தொழிலாளர்கள், பொதுமக்கள் கடுமையாக பாதிக்கப்பட்டுள்ளனர். பெஞ்சல் புயல் பாதிக்கப்பட்டுள்ள தமிழக விவசாயிகளுக்கு, பேரிடர் மேலாண்மை நிதியிலிருந்து சொற்ப நிதி மட்டுமே வழங்கப்பட்டுள்ளது.

தமிழகத்தை வஞ்சிக்கும் மத்திய அரசை கண்டித்து, விவசாயிகள் வெளிநடப்பு செய்து, கோஷங்கள் எழுப்பி ஆர்ப்பாட்டத்தில் ஈடுபட்டனர். அதன் பின்னர் கூட்டத்தில் பங்கேற்ற விவசாயிகள், தங்கள் கருத்துக்களை முன் வைத்தனர்.

இதில் ஜீவக்குமார் பேசுகையில், "சில மாதங்களுக்கு முன்பு அறுவடை சமயத்தில் பெய்த மழையில் நெற்பயிர் பாதிக்கப்பட்டது. அறுவடை செய்யப்பட்ட நெல்லில் ஈரப்பதம் அதிகமாக இருந்ததால் ஈரபதத்தின் அளவை உயர்த்த வேண்டும் என விவசாயிகள் கோரிக்கை வைத்தனர். இதையடுத்து மத்திய குழுவினர் வந்து பாதிப்பை பார்வையிட்டுச் சென்றனர். ஆனால் அதன் பின்னர் ஈரப்பதத்தின் அளைவை கூட மத்திய குழுவினர் அறிவிக்கவில்லை.

ஆய்வுக்கு வந்த மத்திய குழுவை சேர்ந்த அதிகாரிகளுக்கு மாவட்ட நிர்வாகத்தின் சார்பில், முந்திரி பக்கோடா, மைசூர் பாகு, ஜாங்கிரி, மிக்சர் தந்து உபசரிக்கிறோம். இதில் பெரும்பாலும் நெய்யில் செய்த பலகாரங்கள் இடம் பிடிக்கின்றன. குடிப்பதற்கு இளநீர், காபி என ராஜ உபசரிப்பு செய்து திருப்பி அனுப்புகிறோம். ஆய்வு செய்து விட்டு போன பிறகு அவர்களிடமிருந்து எந்த அறிவிப்பும் வருவதில்லை. மண்டபத்தில் விருந்து சாப்பிட்டு விட்டு மொய் வைக்காமல் செல்வது போல் உள்ளது மத்திய குழுவினரின் செயல். பல புயல்களில் பாதிப்பு ஏற்பட்ட போது இது தான் நடந்திருக்கிறது, இப்போதும் இதுவே நடந்திருக்கிறது" என்றார்.

இது நாம் செய்கிற விருந்தோம்பல் என அதிகாரிகள் ஜீவக்குமாரிடம் தெரிவித்தனர்.

Vikatan WhatsApp Channel

இணைந்திருங்கள் விகடனோடு வாட்ஸ்அப்பிலும்... CLICK BELOW LINK

https://bit.ly/VikatanWAChannel