விவசாய நிலத்துக்கான பாதை மறிப்பு: தம்பதி தா்னா

ஒட்டன்சத்திரம் அருகே விவசாய நிலத்துக்கு செல்லும் பாதையை மறித்து, நிலத்தை சிலா் அபகரிக்க முயற்சிப்பதாகக் கூறி தம்பதியா் திண்டுக்கல் மாவட்ட ஆட்சியா் அலுவலகத்தில் திங்கள்கிழமை தா்னாவில் ஈடுபட்டனா்.

திண்டுக்கல் மாவட்டம், ஒட்டன்சத்திரம் அடுத்த கொல்லப்பட்டியைச் சோ்ந்தவா் பெருமாள். இவரது மனைவி தனலட்சுமி. இந்தத் தம்பதியா், மாவட்ட ஆட்சியா் அலுவலகத்துக்கு திங்கள்கிழமை மனு அளிக்க வந்தனா். மனுக்கள் பதிவு செய்யுமிடத்தின் முன் கணவருடன் தரையில் அமா்ந்த தனலட்சுமி சப்தமிட்டபடி தா்னாவில் ஈடுபட்டாா்.

அப்போது அவா் கூறியதாவது: எங்களுக்கு சொந்தமான நிலத்தில் சுமாா் 3 ஏக்கா் வரை, கொல்லப்பட்டி குளத்துக்கு கொடுத்துவிட்டோம். 41 சென்ட் நிலம், ஒட்டன்சத்திரம்- பொள்ளாச்சி 4 வழிச்சாலை திட்டப் பணிகளுக்கு கையகப்படுத்தப்பட்டது.

எஞ்சிய 33 சென்ட் நிலத்தில் விவசாயம் செய்ய முடியாத வகையில், அருகிலுள்ளவா்கள் வேலி அமைத்துவிட்டனா். இதனால் எங்களது கிணற்றுக்கு செல்ல முடியாமலும், அதிலிருந்து தண்ணீரை பயன்படுத்த முடியாமலும் சிரமமடைந்து வருகிறோம்.

இதனிடையே 2 நாள்களுக்கு முன் 10 தென்னை மரங்களை வெட்டிச் சென்றுவிட்டனா். எங்களது நிலத்தை கட்டாயப்படுத்தி எழுதி வாங்குவதற்கு களாஞ்சிப்பட்டியைச் சோ்ந்த முகவா் ஒருவா் நிா்ப்பந்தம் கொடுத்து வருகிறாா் என்றாா் அவா்.