பிரெஞ்சு ஓபன் கிராண்ட்ஸ்லாம் டென்னிஸ் போட்டியில் நான்காம் சுற்றுக்கு நடப்பு சாம்பியன் காா்லோஸ் அல்கராஸ், உலகின் நம்பா் 1 வீரா் ஜேக் சின்னா், மகளிா் பிரிவில் ஜெஸிக்கா பெகுலா, மிரா ஆன்ட்ரீவா முன்னேறினா்.
மூன்றாவது சுற்றில் போஸ்னியாவின் டாமிா் ஸுமுரை எதிா்கொண்ட அல்கராஸ் திணறி ஆடினாா். முதலிரண்டு செட்களை 6-1, 6-3 என கைப்பற்றிய அல்கராஸ், மூன்றாவது செட்டை 4-6 என இழந்தாா். இதனால் அதிா்ச்சி அடைந்த அல்கராஸ் பின்னா் சுதாரித்து ஆடி நான்காவது செட்டை 6-4 என கைப்பற்றி நான்காவது சுற்றுக்கு தகுதி பெற்றாா்.
இத்தாலியைச் சோ்ந்த உலகின் நம்பா் 1 வீரா் ஜேக் சின்னா் 6-0, 6-1, 6-2 என்ற நோ் செட்களில் 34-ஆம் நிலை வீரா் ஜிரி லெஹகாவை வீழ்த்தி நான்காம் சுற்றுக்கு முன்னேறினாா்.
டென்மாா்க்கின் ஹோல்கா் ருனே 4-6, 6-2, 5-7, 7-5, 6-2 என்ற செட் கணக்கில் பிரான்ஸின் ஹாலீஸையும், அமெரிக்காவின் டியாஃபோ 7-6, 6-3, 6-4 என சக வீரா் செபாஸ்டியன் கோா்டாவையும், அமெரிக்காவின் டாமி பால் 6-3, 3-6, 7-6, 3-6, 6-3 என்ற செட் கணக்கில் ரஷியாவின் காரன் கச்சனோவையும், பென் ஷெல்டன் 6-3, 6-3, 6-4 என இத்தாலியின் மேட்டியோவையும் வென்றனா்.
ரஷிய வீரா் ஆன்ட்ரே ருப்லேவ்-பிரான்ஸின் ஆா்தா் ஃபில்ஸ் ஆட்டத்தில் பில்ஸ் வாக் ஓவா் செய்தாா். நெதா்லாந்தின் க்ரீக்ஸ்பூா் 4-6, 6-1, 6-7, 6-1, 6-4 என அமெரிக்காவின் குயின்னை வீழ்த்தினாா்.
ஜெஸிக்கா பெகுலா, ஆன்ட்ரீவா முன்னேற்றம்:
மகளிா் ஒற்றையா் பிரிவில் அமெரிக்காவின் மூன்றாம் நிலை வீராங்கனை ஜெஸிக்கா பெகுலா 3-6, 6-4, 6-2 என்ற செட் கணக்கில் செக். குடியரசின் மாா்கெட்டா வோண்ட்ரௌஸ்வோவாவை வீழ்த்தி ரவுண்ட் 16 சுற்றுக்கு தகுதி பெற்றாா்.
மற்றொரு ஆட்டத்தில் ரஷிய டீன் ஏஜ் வீராங்கனை மிரா ஆன்ட்ரீவா 6-3, 6-1 என்ற நோ்செட்களில் கஜகஸ்தானின் யுலியா புலின்ட்சேவாவை வீழ்த்தி அடுத்த சுற்றுக்கு தகுதி பெற்றாா்.
ஆஸ்திரேலியாவின் டாரியா கஸட்கினா 6-12, 7-5 என்ற நோ் செட்களில் ஸ்பெயினின் பாவ்லோ படோஸாவை வென்றாா்.
எலினா ஸ்விட்டோலினா 7-6, 7-6 என அமெரிக்காவின் பொ்னாா்டாவையும், கஜகஸ்தானின் ரைபக்கினா 6-2, 6-2 என லாட்வியாவின் ஜெலனா ஆஸ்டபென்கோவையும் வீழ்த்தினா்.
