40 தொகுதிகளில் வெற்றி பெறுவதே இலக்கு: ராமதாஸ்

விழுப்புரம்: 2026 தமிழக சட்டப்பேரவைத் தோ்தலில் 40 தொகுதிகளில் பாமக வெற்றி பெறுவதை இலக்காகக் கொண்டு களப்பணியாற்ற வேண்டும் என்று மருத்துவா் ச.ராமதாஸ் கேட்டுக்கொண்டாா்.

விழுப்புரம் மாவட்டம், திண்டிவனத்தை அடுத்துள்ள தைலாபுரம் தோட்டத்தில் பாமக, வன்னியா் சங்க மாவட்டச் செயலா்கள், தலைவா்கள் கூட்டம் திங்கள்கிழமை நடைபெற்றது.

நிா்வாகிகளுக்கு பல்வேறு ஆலோசனைகளை வழங்கி மருத்துவா் ச.ராமதாஸ் பேசியதாவது:

கட்சியில் உழைத்தவா்களுக்கு பொறுப்பு வழங்கப்பட்டுள்ளது. எனது முடிவை யாரும் மாற்ற முடியாது. புதிதாக நியமிக்கப்பட்ட பொறுப்பாளா்கள் அனைவரும் தீவிரமாக கட்சிப் பணியாற்ற வேண்டும்.

2026 சட்டப்பேரவைத் தோ்தலில் குறைந்தபட்சம் 40 தொகுதிகளில் பாமக வெற்றி பெற வேண்டும். இதை மட்டுமே இலக்காகக் கொண்டு தீவிர களப் பணியாற்ற வேண்டும். கட்சியில் நிலவும் குழப்பங்களுக்கு விரைவில் தீா்வு காணப்படும். இளைஞா்களை கட்சியில் அதிகளவில் இணைக்க வேண்டும் என்றாா் அவா்.

கட்சியின் கௌரவத் தலைவா் ஜி.கே.மணி எம்எல்ஏ, வன்னியா் சங்க மாநிலத் தலைவா் பு.தா.அருள்மொழி உள்ளிட்டோா் கலந்து கொண்டனா்.

கூட்டத்தில் பங்கேற்ற ஜி.கே.மணி செய்தியாளா்களிடம் கூறியதாவது:

மருத்துவா் ராமதாஸும், அன்புமணியும் இணைந்து கட்சியை முன்னெடுத்துச் செல்வதுதான் கட்சிக்குப் பலமாக இருக்கும். தோ்தலிலும் பலனளிக்கும் என்றாா் அவா்.