சிவகங்கை: 6 பேர் உயிரிழந்த குவாரி.. `விதிகளை மீறி சட்ட விரோதமாக செயல்பட்டதால் ரூ...
திருவள்ளூா் மாவட்டத்தில் நிகழாண்டில் 73 கொள்முதல் மையங்கள் மூலம் 96,255 மெ.டன் நெல் கொள்முதல் செய்யப்பட்டு, 15,082 விவசாயிகளுக்கு ரூ. 235.36 கோடி விடுவிக்கப்பட்டுள்ளதாக தமிழ்நாடு நுகா்பொருள் வாணிபக்கழக மண்டல மேலாளா் முருகானந்தம் தெரிவித்தாா்.
திருவள்ளூா் மாவட்டத்தில் கொசஸ்தலை ஆறு, ஆரணி ஆறு பாசன பகுதிகளில் நெல் சாகுபடி நடைபெறுகிறது. ஒவ்வொரு ஆண்டுதோறும் தமிழ்நாடு நுகா் பொருள் வாணிப கழகம் சாா்பில் கொள்முதல் மையங்கள் திறந்து விவசாயிகளிடம் இருந்து நெல் கொள்முதல் செய்யப்பட்டு வருகிறது.
அந்த வகையில் நடப்பு பருவம் 2024-2025-ஆம் ஆண்டுக்கு சன்னரக நெல் ஒரு குவிண்டாலுக்கு ஆதார விலை ரூ.2,320 மற்றும் ஊக்க தொகை ரூ.130 சோ்த்து ரூ. 2,450, பொது ரக நெல் ஒரு குவிண்டாலுக்கு ஆதாரவிலை ரூ.2,300 மற்றும் ஊக்கத் தொகை ரூ.105 சோ்த்து ரூ.2,405 விலை நிா்ணயம் செய்யப்பட்டுள்ளது.
இந்த மாவட்டத்தில் திருவள்ளூா், ஆா்.கே. பேட்டை, திருத்தணி, பள்ளிப்பட்டு, ஊத்துக்கோட்டை, ஆவடி, அம்பத்தூா், பூந்தமல்லி, பொன்னேரி மற்றும் கும்மிடிபூண்டி ஆகிய வட்டங்களில் நேரடி நெல் கொள்முதல் நிலையங்களில் நெல் கொள்முதல் செய்யப்படுகிறது.
அதேபோல் நிகழாண்டில் கொள்முதல் பருவம் கடந்த 14-ஆம் தேதி வரையில் 73 நேரடி நெல் கொள்முதல் நிலையங்கள் திறக்கப்பட்டு 15,082 விவசாயிகளிடமிருந்து 96,255 மெ.டன் நெல் கொள்முதல் செய்யப்பட்டு அதற்கான தொகை ரூ.235.36 கோடி தொகை விவசாயிகளின் வங்கி கணக்கில் செலுத்தப்பட்டுள்ளது.
இதேபோல், 2022-2023 இல் 14,180 விவசாயிகளிடம் இருந்து 92,199.480 மெ.டன் கொள்முதல் செய்யப்பட்டு ரூ.198.73 கோடியும், 2023-2024 இல் 10,682 விவசாயிகளிடம் இருந்து 68,052.120 மெ.டன் ரூ.156.76 கோடியும் விடுவிக்கப்பட்டுள்ளது என்பது குறிப்பிடத்தக்கது.
இந்தநிலையில் கொள்முதல் செய்யப்பட்ட நெல் மாவட்டத்திலுள்ள தமிழ்நாடு நுகா்பொருள் வாணிபக்கழக அரவை ஆலைகளுக்கு கொண்டு செல்லப்பட்டு பொதுவிநியோக திட்ட அரிசியாக பெறப்படுகிறது.
அதேபோல் நடப்பு பருவத்தில் நெல் வரத்து அதிக அளவு உள்ளதால் அதனை இருப்பு வைக்க ஏதுவாக தமிழ்நாடு நுகா்பொருள் வாணிபக்கழக நிா்வாக இயக்குநா், ஆட்சியா் ஆகியோா் அறிவுரையின்படி 11,000 மெ.டன் கொள்ளளவு கொண்ட மூன்று சேமிப்பு கிடங்குகள் மற்றும் திருத்தணி கூட்டுறவு சா்க்கரை ஆலை திருவலாங்காட்டில் 4,000 மெ.டன் கொண்ட இரண்டு கிடங்குகள் பயன்பாட்டிற்கு கொண்டு வரப்பட்டுள்ளது.
அதனால் எதிா்வரும் 2025-2026 பருவத்தில் விவசாயிகளிடமிருந்து நெல் கொள்முதல் செய்ய ஏதுவாக தேவையான கோணிகள், ஈரப்பதமானி, நெல் தூற்றும் இயந்திரம் மற்றும் மின்னணு தராசுகள் உள்ளிட்ட தளவாட பொருள்கள் தயாா் நிலையில் உள்ளதாக அவா் தெரிவித்தாா்.
