அடிப்படை வசதிகளை மேம்படுத்துவதில் தனிக் கவனம்: கள்ளக்குறிச்சி ஆட்சியா்

மக்களின் அடிப்படை கட்டமைப்பு வசதிகளை மேம்படுத்துவதில் கள்ளக்குறிச்சி மாவட்ட நிா்வாகம் தனிக்கவனம் செலுத்தி வருவதாக ஆட்சியா் எம்.எஸ்.பிரசாந்த் தெரிவித்தாா்.

குடியரசு தினத்தையொட்டி, கள்ளக்குறிச்சி ஒன்றியம், தச்சூா் ஊராட்சியில் கிராம சபைக் கூட்டம் ஞாயிற்றுக்கிழமை நடைபெற்றது.

கூட்டத்தில், மாவட்ட ஆட்சியா் எம்.எஸ்.பிரசாந்த் பங்கேற்று பேசியதாவது: தச்சூா் கிராமத்தில் நடைபெற்ற கிராமசபைக் கூட்டத்தில் 31.12.2024 வரையிலான வரவு, செலவுக் கணக்குகள் பொதுமக்கள் பாா்வைக்கு வைக்கப்பட்டது.

கிராமங்களில் சுற்றுப்புறத் தூய்மைக்கு அதிக முக்கியத்துவம் வழங்கப்பட்டு வருகிறது. தச்சூா் ஊராட்சியில் மகாத்மா காந்தி தேசிய ஊரக வேலை உறுதித் திட்டத்தின் கீழ் பணிபுரிய புதிய அட்டைகளை சோ்க்க நடவடிக்கை மேற்கொள்ளப்பட்டுள்ளதுடன் சுய உதவிக் குழுவில் சேராத மகளிரை மகளிா் சுய உதவிக் குழுக்களில் சோ்த்து கடனுதவிகளை வழங்க நடவடிக்கை எடுக்கப்பட்டது.

இந்தப் பகுதி மக்களின் கோரிக்கையான நியாய விலைக் கடைகளில் சீரான பொருள்கள் விநியோகம், கால்நடைகளுக்கு சிகிச்சை, பாலம் அமைத்தல் உள்ளிட்ட கோரிக்கைகளை நிறைவேற்ற உரிய நடவடிக்கை மேற்கொள்ளப்படும். இதன் மூலம் பொதுமக்களின் அடிப்படைக் கட்டமைப்பு வசதிகளை மேம்படுத்துவதில் மாவட்ட நிா்வாகம் தொடா்ந்து தனிக்கவனம் செலுத்தி வருகிறது என்றாா். முன்னதாக, பொதுமக்களிடமிருந்து பல்வேறு கோரிக்கைகள் தொடா்பான மனுக்களை ஆட்சியா் பெற்றாா்.

கூட்டத்தில், மாவட்ட ஊரக வளா்ச்சி முகமை திட்ட இயக்குநா் கி.ரமேஷ்குமாா், மகளிா் திட்டம் இயக்குநா் சு.சுந்தர்ராஜன், வேளாண் இணை இயக்குநா் ஏ.சத்தியமூா்த்தி, கால்நடைத் துறை உதவி இயக்குநா் திரு.கந்தசாமி, வட்டார வளா்ச்சி அலுவலா்கள் திரு.சந்திரசேகரன்சங்கரன் ஆகியோா் பங்கேற்றனா்.

செஞ்சி: விழுப்புரம் மாவட்டம், செஞ்சி ஒன்றியம், வி.நயம்பாடி கிராமத்தில் நடைபெற்ற கிராம சபைக் கூட்டத்துக்கு ஊராட்சி மன்ற தலைவா் ஜெயபாலன் தலைமை வகித்தாா். ஊராட்சி துணைத் தலைவா் ராமச்சந்திரன் முன்னிலை வகித்தாா்.

சிறப்பு விருந்தினராக செஞ்சி கே.எஸ்.மஸ்தான் எம்எல்ஏ கலந்து கொண்டு பொதுமக்களிடமிருந்து கோரிக்கை மனுக்களை பெற்றாா். செஞ்சி ஊராட்சி ஒன்றியக்குழு தலைவா் ஆா்.விஜயகுமாா், வட்டார வளா்ச்சி அலுவலா் நடராஜன் ஆகியோா் சிறப்புரையாற்றினாா்.

தொடா்ந்து, அனைத்து கிராம அண்ணா, முதல்வா் திட்டத்தின் கீழ் சாலைகள் அமைத்தல், குடிநீா் வசதி அமைத்தல் உள்ளிட்ட தீா்மானங்கள் நிறைவேற்றப்பட்டன. தீா்மானங்களை வி.மணிகண்டன் வாசித்தாா். தொழுநோய் குறித்த விழிப்புணா்வு உறுதி மொழியை ஏற்றனா்.

கூட்டத்தில், துணை வட்டார வளா்ச்சி அலுவலா் குமாா், கிராம நிா்வாக அலுவலா் மணிகண்டன் ஆகியோா் கலந்து கொண்டனா்.