திண்டுக்கல்லை அடுத்த தாமரைப்பாடி புனித அந்தோணியாா் கலை அறிவியல் கல்லூரியில், ‘இந்திய இலக்கியத்தில் உளவியல் ரீதியான ஆராய்ச்சி’ என்ற தலைப்பில் ஒரு நாள் தேசிய கருத்தரங்கம் புதன்கிழமை நடைபெற்றது.
இந்தக் கருத்தரங்குக்கு கல்லூரிச் செயலா் அருள்தேவி தலைமை வகித்தாா். சிறப்பு அழைப்பாளராக புதுச்சேரி பல்கலை. ஆங்கிலப் புலத் தலைவா் டி.மாா்க்ஸ் கலந்து கொண்டு பேசியதாவது: அகந்தையை அகற்றுவதும், ஆழ்மனதைக் கட்டுப்படுத்துவதும், சமூக பாா்வையுடன் கூடிய சிந்தனையும் இன்றைய தலைமுறையினருக்கு அவசியமானதாக உள்ளது. பெரும்பாலானவா்களிடம் சமூக பாா்வை இல்லை. இந்த நிலை மாற வேண்டும்.
மனிதனின் ஆழ்மனதில் பதிவு செய்யப்படும் நிகழ்வுகள் தான் கனவுகளாக தோன்றுகின்றன. உளவியல் சாா்ந்த அணுகுமுறை இருக்குமானால், இந்திய இலக்கியத்தை புரிந்து கொள்ள முடியும். இதன் மூலம், புதிய படைப்பாளியாகவும் உயரலாம் என்றாா் அவா்.
இந்த நிகழ்ச்சியில் மதுரை காமராஜா் பல்கலை. தொலைத் தூரக் கல்லூரி ஆங்கிலத் துறைத் தலைவா் ஆா்.தயாளகிருஷ்ணன், ஆங்கிலத் துறை பேராசிரியா் ரெ.மனோகரன், உதவிப் பேராசிரியா் ஏ.பிரின்சி உள்ளிட்டோா் கலந்து கொண்டனா். இந்தக் கருத்தரங்கில் 80-க்கும் மேற்பட்ட கல்லூரி மாணவா்கள் பங்கேற்றனா்.
