அரசு புறம்போக்கு இடத்தில் ஆக்கிரமிப்புகளை அகற்ற எதிா்ப்பு

கடலூா் மாவட்டம், நெல்லிக்குப்பம் அருகே அரசு புறம்போக்கு இடத்தில் உள்ள ஆக்கிரமிப்புகளை நெல்லிக்குப்பம் நகராட்சி நிா்வாகம் அகற்ற முற்பட்டபோது, அங்கிருந்தவா்கள் எதிா்ப்புத் தெரிவித்து தடுத்து நிறுத்தினா்.

நெல்லிக்குப்பம் நகராட்சி, வான்பாக்கத்தை அடுத்த தென்பெண்ணை ஆற்றின் சுங்கச்சாலை தெற்கு பக்கம் பகுதியில் நெல்லிக்குப்பம் நகராட்சி சாா்பில் கசடு கழிவுநீா் சுத்திகரிப்பு நிலையம் அமைக்கப்பட உள்ளது. இதற்காக அப்பகுதியில் உள்ள அரசு புறம்போக்கு நிலத்தில் இருந்த ஆக்கிரமிப்புகளை நகராட்சி நிா்வாகம் வியாழக்கிழமை அகற்ற முற்பட்டபோது, அப்பகுதி மக்கள் நகா்மன்ற உறுப்பினா் ஹேமாவதி தலைமையில் தடுத்து நிறுத்தி வாக்குவாதத்தில் ஈடுபட்டனா். இதையடுத்து, அமைதிப் பேச்சுவாா்த்தை நடத்தி தீா்வு காண்பதென தெரிவிக்கப்பட்டதைத் தொடா்ந்து, அனைவரும் கலைந்து சென்றனா்.

இதுகுறித்து நெல்லிக்குப்பம் நகராட்சி ஆணையா் கிருஷ்ணராஜன் கூறியதாவது: வான்பாக்கம் சுங்கச்சாலை அருகே அரசுக்குச் சொந்தமான புறம்போக்கு நிலம் சுமாா் 2 ஏக்கா் உள்ளது. இங்கு கசடு கழிவுநீா் சுத்திகரிப்பு நிலையம் அமைப்பதற்கு ரூ.12 கோடி நிதி ஒதுக்கப்பட்டுள்ளது. இந்த நிலத்தில் அப்பகுதியைச் சோ்ந்தவா்கள் சவுக்கு பயிரிட்டுள்ளனா்.

இந்த நிலையில், வியாழக்கிழமை நகராட்சி சாா்பில் ஆக்கிரமிப்புகளை அகற்றச் சென்றோம். அப்போது, அப்பகுதியைச் சோ்ந்த பொதுமக்கள், ஆக்கிரமிப்புகளை அகற்றுவதற்கும், கசடு கழிவுநீா் சுத்திகரிப்பு நிலையம் அமைப்பதற்கும் எதிா்ப்புத் தெரிவித்து வாக்குவாதத்தில் ஈடுபட்டனா். இதையடுத்து, அவா்களிடம் பேச்சுவாா்த்தை நடத்தப்பட்டது. இதில், வரும் 24-ஆம் தேதி நெல்லிக்குப்பம் நகராட்சியில் அமைதி பேச்சுவாா்த்தை நடத்த முடிவு செய்யப்பட்டுள்ளது என்றாா்.

நிகழ்வின்போது, நெல்லிக்குப்பம் மேலாளா் சரவணன், வருவாய் ஆய்வாளா் ஜான் பால், பொறியாளா் பிரவீன் குமாா், நில அளவா் நந்தகுமாா், நகரமைப்பு ஆய்வாளா் செந்தில் குமாா், செழியன், பணி மேற்பாா்வையாளா் ரமேஷ், துப்புரவு ஆய்வாளா் கேசவன், நெல்லிக்குப்பம் வருவாய் ஆய்வாளா் ஜான் சிராணி, காவல் ஆய்வாளா் வேலுமணி, உதவி ஆய்வாளா் உலகநாதன் உடனிருந்தனா்.