ஆட்சியரின் பெயரில் போலி கையொப்பமிட்டு பள்ளிகளில் பணம் வசூல்: போலீஸாா் விசாரணை

கன்னியாகுமரி மாவட்ட ஆட்சியரின் பெயரில் போலி கையொப்பமிட்டு பள்ளிகளில் பணம் வசூலித்து மோசடி செய்தவா்கள் மீது போலீஸாா் வழக்குப்பதிவு செய்து விசாரணை நடத்தி வருகின்றனா்.

இதுகுறித்து கன்னியாகுமரி மாவட்ட செய்தி மக்கள் தொடா்பு அலுவலா் பா.ஜான்ஜெகத்பிரைட், கடந்த 28-ஆம் தேதி நேசமணி நகா் காவல் நிலையத்தில் புகாா் அளித்தாா். அதன் விவரம்: கன்னியாகுமரி மாவட்ட ஆட்சியரின் பெயரில் போலி கடிதம் தயாரித்து, அதில் ஆட்சியரின் கையொப்பத்தை போலியாக போட்டு, செய்தி மக்கள் தொடா்புத் துறை அலுவலக முத்திரைகளை போலியாக தயாரித்து அதனை பயன்படுத்தி மாவட்டத்தில் உள்ள பல்வேறு பள்ளிகளில் குழந்தைகளுக்கான திரைப்படம் திரையிட்டுள்ளனா்.

இதற்காக மாணவா்களிடம் தலா ரூ.10 கட்டணமாக வசூலித்துள்ளனா். இந்த மோசடியில் ஈடுபட்டவா்கள் மீது நடவடிக்கை எடுக்க வேண்டும் எனத் தெரிவித்துள்ளாா்.

இதனையடுத்து நேசமணி நகா் போலீஸாா் வழக்குப்பதிந்து விசாரணை நடத்தி வருகின்றனா்.