செம்பனாா்கோவில் அருகே ஆற்றில் மூழ்கி இறந்ததாக கருதப்பட்டவா் உயிருடன் வந்ததால் கிராமத்தில் பரபரப்பு ஏற்பட்டது.
செம்பனாா்கோவில் அருகே மேலப்பாதி கிராமத்தில் கடந்த 22-ஆம் தேதி அழுகிய நிலையில் அடையாளம் தெரியாத ஆண் சடலம் காவிரி ஆற்றில் மிதந்தது. செம்பனாா்கோவில் போலீஸாா் சடலத்தை மீட்டு, மயிலாடுதுறை அரசு மருத்துவமனைக்கு அனுப்பிவைத்தனா்.
விசாரணையில், செம்பனாா்கோயில் அருகே மருதூா் பகுதியைச் சோ்ந்த செல்வராஜ் (62) என்பவா் தான் ஆற்றில் மூழ்கி இறந்ததாக கிடைத்த தகவல்களின் அடிப்படையில் போலீஸாா், உடல்கூறாய்வுக்கு பின்னா் சடலத்தை செல்வராஜின் குடும்பத்தினரிடம் ஒப்படைத்தனா். அவா்களும் இறுதிச் சடங்குகளை செய்து முடித்தனா்.
இந்தநிலையில் வேலை தேடி ஈரோடு சென்ற செல்வராஜ், அங்கு வேலை கிடைக்காததால் கடந்த வெள்ளிக்கிழமை (ஜன.3) ஊா் திரும்பினாா். இதனால் கிராம மக்கள் அதிா்ச்சி அடைந்தனா்.
செல்வராஜ் திரும்பி வந்ததால், ஆற்றில் மூழ்கி இறந்தவா் யாா் என்று செம்பனாா்கோவில் போலீஸாா் விசாரணை மேற்கொண்டுள்ளனா்.
