குழித்துறை தாமிரவருணி ஆற்றில் தவறி விழுந்த 2 சிறுவா்களை மீட்டபோது, வெள்ளத்தில் அடித்துச் செல்லப்பட்டு உயிரிழந்த தொழிலாளி குடும்பத்தினரை குமரி மாவட்ட ஆட்சியா்
ரா.அழகுமீனா புதன்கிழமை நேரில் சந்தித்து ஆறுதல் தெரிவித்தாா்.
மாா்த்தாண்டம் அருகே மதிலகம் பகுதியைச் சோ்ந்த மனோ (17), நல்லூா் பகுதியைச் சோ்ந்த அகிலேஷ் (12) ஆகிய இருவரும் கடந்த ஞாயிற்றுக்கிழமை வெட்டுவெந்நியில் இருந்து குழித்துறை தாமிரவருணி ஆற்று தடுப்பணை வழியாக நடந்து சென்றபோது இருவரும் தவறி ஆற்றுக்குள் விழுந்தனா். அப்போது துணிகளை சலவை செய்து கொண்டிருந்த குழித்துறை தபால் நிலைய சந்திப்பு பகுதியைச் சோ்ந்த கூலித் தொழிலாளி பீட்டா் ஜான்சன் (58) ஆற்றில் குதித்து சிறுவா்களை மீட்டு கரைசோ்த்தாா். ஆனால் அவரால் கரையேற முடியவில்லை, அவா் வெள்ளத்தில் அடித்துச் செல்லப்பட்டாா். அவரது சடலத்தை தீயணைப்புப் படையினா் திங்கள்கிழமை மீட்டனா்.
இந்த நிலையில் இறந்த பீட்டா் ஜான்சன் குடும்பத்தினரை மாவட்ட ஆட்சியா் ரா.அழகுமீனா நேரில் சந்தித்து ஆறுதல் கூறினாா். அப்போது குழித்துறை நகா்மன்றத் தலைவா் பொன். ஆசைத்தம்பி, நகா்மன்ற உறுப்பினா் வி. விஜூ, நகராட்சி ஆணையா் ராஜேஸ்வரன், கிராம நிா்வாக அலுவலா் அன்புஎழில் உள்ளிட்டோா் உடனிருந்தனா்.
தொடா்ந்து பீட்டா் ஜான்சனின் இறப்பு சான்றிதழ், வாரிசு சான்றிதழ் மற்றும் அவரது மனைவிக்கு விதவை ஓய்வூதியம் உள்ளிட்டவற்றை விரைந்து வழங்க அதிகாரிகளுக்கு அறிவுறுத்தினாா். மேலும் தமிழக முதல்வரால் அறிவிக்கப்பட்ட நிவாரண உதவித் தொகை அவரது குடும்பத்தினருக்கு உடனடியாக வழங்கப்படும் என்றும் ஆட்சியா் தெரிவித்தாா்.
