இனாம் மணியாச்சியில் வீட்டின் பூட்டை உடைத்து தங்க நகைகள் மற்றும் பணத்தை திருடி சென்ற மா்ம நபா்களை போலீஸாா் தேடி வருகின்றனா்.
இனாம்மணியாச்சி செல்லியாரயம்மன் கோயில் தெருவை சோ்ந்தவா் மூக்கையா மகன் பரமசிவம். இவரது மனைவி பாா்வதி. கூலித் தொழிலாளியான தம்பதி, வெள்ளிக்கிழமை வழக்கம் போல வீட்டை பூட்டிவிட்டு வேலைக்கு சென்றுவிட்டாா்களாம். இந்நிலையில் பாா்வதி மதியம் வீட்டிற்கு வந்தாராம். அப்போது கதவின் பூட்டு உடைக்கப்பட்டு, பீரோ மற்றும் சூட்கேசில் இருந்த துணிகள் சிதறி கிடந்ததாம். சூட்கேசில் வைத்திருந்த சுமாா் 9 பவுன் தங்க நகைகள், ரொக்கம் ரூ.18 ஆயிரம் திருடு போயிருப்பது தெரிய வந்ததாம்.
சம்பவ இடத்தில் காவல் துணை கண்காணிப்பாளா் ஜெகநாதன், மேற்கு காவல் நிலைய ஆய்வாளா் நவநீதகிருஷ்ணன் ஆகியோா் பாா்வையிட்டு ஆய்வு மேற்கொண்டனா். இது குறித்து மேற்கு காவல் நிலைய போலீஸாா் வழக்குப் பதிந்து விசாரணை நடத்தி வருகின்றனா்.
