இளைஞா் கொலை வழக்கில் குற்றவாளிக்கு ஆயுள் சிறை

அரியலூா் மாவட்டம், க.பொய்யூா் அருகே இளைஞா் கொலை செய்யப்பட்ட வழக்கில் குற்றவாளிக்கு ஆயுள் தண்டனை விதித்து அரியலூா் நீதிமன்றம் வியாழக்கிழமை தீா்ப்பளித்தது.

கீழப்பழூா் அருகேயுள்ள க.பொய்யூா், வடக்குத் தெருவைச் சோ்ந்த புகழேந்தி மகன் விக்னேஷ்(25). அதே தெருவைச் சோ்ந்தவா் தா்மராஜ்(24).

இவா்களிடையே கடந்த 2022-ஆம் ஆண்டு நடைபெற்ற ஐபிஎல் கிரிக்கெட் போட்டி தொடா்பாக ஏற்பட்ட தகராறில் ஆத்திரமடைந்த தா்மராஜ், விக்னேஷை கிரிக்கெட் மட்டையால் தாக்கி கொலை செய்தாா்.

இதுகுறித்து, கீழப்பழுவூா் காவல் துறையினா் தா்மராஜை கைது செய்து, அரியலூா் மாவட்ட முதன்மை அமா்வு நீதிமன்றத்தில் வழக்குத் தொடுத்தனா்.

வழக்கை விசாரித்து வந்த நீதிபதி மலா் வாலாண்டினா, குற்றவாளி தா்மராஜூக்கு ஆயுள் சிறைத் தண்டனையும், ரூ.25 ஆயிரம் அபராதமும் விதித்து வியாழக்கிழமை தீா்ப்பளித்தாா். இதையடுத்து தா்மராஜ் திருச்சி மத்திய சிறையில் அடைக்கப்பட்டாா்.