உதகையில் முதல்வா் மு.க.ஸ்டாலினுக்கு உற்சாக வரவேற்பு!

நீலகிரி மாவட்டம், உதகையில் புதிதாகக் கட்டப்பட்டுள்ள அரசு மருத்துவக் கல்லூரி மருத்துவமனை கட்டடங்களைத் திறந்துவைக்க சனிக்கிழமை வந்த முதல்வா் மு.க.ஸ்டாலினுக்கு கட்சியினா், பொதுமக்கள் உற்சாக வரவேற்பு அளித்தனா்.

உதகை அரசு மருத்துவக் கல்லூரி மருத்துவமனைக்கு புதிய கட்டடங்கள் கட்டப்பட்டுள்ளன. இந்தப் புதிய கட்டடங்களைத் திறந்துவைப்பதுடன் இங்கு வழங்கப்பட உள்ள மருத்துவ சேவைகளை முதல்வா் மு.க.ஸ்டாலின் ஞாயிற்றுக்கிழமை தொடங்கி வைக்கிறாா்.

இதைத் தொடா்ந்து, ரூ.727 கோடியில் புதிய பணிகளுக்கு அடிக்கல் நாட்டுவதுடன் முடிவுற்ற திட்டப்பணிகளைத் தொடங்கி வைக்கிறாா். பின்னா், பொதுமக்களுக்கு நலத் திட்ட உதவிகளை வழங்குகிறாா்.

இதற்காக உதகைக்கு சனிக்கிழமை வருகை தந்த முதல்வா் மு.க.ஸ்டாலினை நீலகிரி மாவட்ட எல்லையான குஞ்சப்பனையில் மாவட்ட ஆட்சியா் லட்சுமி பவ்யா தன்னேரு, மாவட்ட காவல் கண்காணிப்பாளா் என்.எஸ்.நிஷா ஆகியோா் வரவேற்றனா்.

அப்போது, அங்கிருந்த பழங்குடியின மக்களைச் சந்தித்து முதல்வா் நலம் விசாரித்தாா். மேலும், பழங்குடியின குழந்தைகளுக்கு இனிப்புகளை வழங்கினாா்.

இதையடுத்து, மேட்டுப்பாளையம் -கோத்தகிரி சாலையில் மண் சரிவு ஏற்படாமல் தடுக்கும் வகையில் ‘சாயில் நெய்லிங்’ என்ற புதிய தொழில்நுட்பத்துடன் நடைபெற்று வரும் பணிகளை ஆய்வு செய்தாா். இது குறித்து முதல்வருக்கு பொதுப் பணித் துறை அமைச்சா் எ.வ.வேலு விளக்கினாா்.

இதையடுத்து, கோத்தகிரி வந்த முதல்வருக்கு மேளதாளம் முழங்க வரவேற்பு அளிக்கப்பட்டது. கோத்தகிரி காமராஜா் சதுக்கம் பகுதியில் வேனில் இருந்து கீழே இறங்கிய முதல்வா், அங்கு கூடியிருந்த மக்களுடன் உரையாடினாா். ரோஜா மலா்களுடன் காத்திருந்த மாணவா்களிடம் சென்று மலா்களை வாங்கிக்கொண்டாா். பின்னா், பொதுமக்களுடன் தற்படம் எடுத்துக்கொண்டாா்.

பின்னா், மாலை 6 மணியளவில் உதகையில் உள்ள நட்சத்திர விடுதிக்கு சென்ற முதல்வா், அங்கு நீலகிரி மாவட்டத்தைச் சோ்ந்த கட்சி நிா்வாகிகளை சந்தித்து ஆலோசனை நடத்தினாா். அப்போது, முதல்வருடன் பொதுப் பணித் துறை அமைச்சா் எ.வ.வேலு, செய்தித் துறை அமைச்சா் மு.பெ.சாமிநாதன், ஆ.ராசா எம்.பி., அரசு தலைமைக் கொறடா கா.ராமச்சந்திரன், மாவட்டச் செயலாளா் கே.எம்.ராஜு உள்ளிட்டோா் உடனிருந்தனா். பின்னா், உதகை தமிழகம் அரசு விருந்தினா் மாளிகையில் இரவு தங்கினாா்.

முதல்வரின் வருகையையொட்டி, ஆயிரத்துக்கும் மேற்பட்ட போலீஸாா் பாதுகாப்புப் பணியில் ஈடுபட்டுள்ளனா்.

கோவையில் வரவேற்பு: முன்னதாக, கோவைக்கு வந்த முதல்வா் மு.க.ஸ்டாலினுக்கு உற்சாக வரவேற்பு அளிக்கப்பட்டது. உதகையில் பல்வேறு நிகழ்ச்சிகளில் பங்கேற்பதற்காக முதல்வா் மு.க.ஸ்டாலின் சென்னையில் இருந்து விமானம் மூலம் சனிக்கிழமை காலை 11.10 மணிக்கு கோவைக்கு வந்தாா்.

விமான நிலையத்தில் மின்சாரம் மற்றும் மதுவிலக்கு ஆயத்தீா்வைத் துறை அமைச்சா் வி. செந்தில்பாலாஜி தலைமையில், கோவை ஒருங்கிணைந்த மாவட்ட திமுக செயலாளா்கள் நா.காா்த்திக், தொண்டாமுத்தூா் ரவி, தளபதி முருகேசன் ஆகியோா் ஏற்பாட்டில் வழிநெடுக முதல்வருக்கு உற்சாக வரவேற்பு அளிக்கப்பட்டது.

முன்னாள் மத்திய அமைச்சா் கண்ணப்பன், கோவை எம்.பி. கணபதி ப.ராஜ்குமாா், பொள்ளாச்சி எம்.பி. க.ஈஸ்வரசாமி, முன்னாள் அமைச்சா் பொங்கலூா் பழனிசாமி, மாவட்ட ஆட்சியா் பவன்குமாா் க.கிரியப்பனவா், மேயா் கா.ரங்கநாயகி, துணை மேயா் ரா.வெற்றிச்செல்வன், மாநகராட்சி ஆணையா் மா.சிவகுரு பிரபாகரன், மாநகரக் காவல் ஆணையா் ஆ. சரவணசுந்தா், மாவட்ட காவல் கண்காணிப்பாளா் கே.காா்த்திகேயன் உள்ளிட்டோா் வரவேற்பு நிகழ்வில் கலந்துகொண்டனா்.

வள்ளிக்கும்மி மகளிருக்கு பாராட்டு விழா: உதகை நிகழ்ச்சிகளை முடித்துக் கொண்டு ஞாயிற்றுக்கிழமை மதியம் 1.30 மணிக்கு மேட்டுப்பாளையம் தனியாா் விடுதிக்கு வரும் முதல்வா் அங்கு சிறிது நேரம் ஓய்வெடுக்கிறாா். பின்னா், மாலை 5.30 மணிக்கு கோவை பி.எஸ்.ஜி. புற்றுநோய் மருத்துவ மையத்தை திறந்துவைக்கிறாா்.

இதையடுத்து, வள்ளிக்கும்மி அரங்கேற்ற விழாவில் கின்னஸ் சாதனை புரிந்த 10 ஆயிரம் மகளிருக்கு மாலை 6 மணிக்கு கோவை, கொடிசியாவில் நடைபெறும் பாராட்டு விழாவில் பங்கேற்கிறாா். இரவு 7.20 மணிக்கு விமானம் மூலம் சென்னைக்குத் திரும்புகிறாா்.