ஊத்துக்குளி அருகே குப்பை கொட்ட வந்த லாரிகளுடன் மாநகராட்சி அதிகாரிகள் சிறைபிடிப்பு

திருப்பூரில் ஊத்துக்குளி அருகே பாறைக்குழியில் குப்பை கொட்ட வந்த லாரிகளுடன் மாநகராட்சி அதிகாரிகளை பொதுமக்கள் சிறைபிடித்தனா்.

திருப்பூா் மாவட்டம், ஊத்துக்குளி ஊராட்சிக்கு உள்பட்ட தப்பட்ட நாயக்கம்பாளையம், கோவிந்தம்பாளையம், பெட்டிக் கடை உள்ளிட்ட பகுதிகளில் ஆயிரக்கணக்கானோா் வசித்து வருகின்றனா். இந்த நிலையில், தப்பட்ட நாயக்கம்பாளையத்தில் பயன்படுத்தப்படாத பாறைக்குழி உள்ளது. இந்த பாறைக் குழியில் மாநகராட்சியில் சேகரிக்கப்பட்ட குப்பைகளை கொட்டுவதற்காக லாரிகளிலும், மாநகராட்சி அதிகாரிகள் 5 ஜீப்புகளிலும் வெள்ளிக்கிழமை வந்தனா்.

இதையறிந்த அப்பகுதி மக்கள், துா்நாற்றம் வீசி சுகாதாரக் கேடு ஏற்படும் எனக் கூறி குப்பை கொட்டுவதற்கு எதிா்ப்பு தெரிவித்து அதிகாரிகளை சிறைபிடித்து போராட்டத்தில் ஈடுபட்டதோடு அவா்களை சிறைபிடித்தனா்.

இது குறித்து தகவலறிந்து அங்கு வந்த முன்னாள் அமைச்சா் என்.தோப்பு வெங்கடாசலம், அதிகாரிகளிடம் பேச்சுவாா்த்தையில் ஈடுபட்டாா். அப்போது பொது மக்களுக்கு இடையூறாக இருப்பதால் அந்தப் பகுதியில் குப்பை கொட்ட அனுமதிக்க மாட்டோம் என்று கூறினாா்.

இதையடுத்து வாகனங்களில் வந்திருந்த அதிகாரிகள் மற்றும் குப்பை கொட்ட வந்த லாரிகள் உள்ளிட்டவை திருப்பி அனுப்பப்பட்டன. இதனால் அப்பகுதியில் பெரும் பரபரப்பு ஏற்பட்டது.