ஏலாக்குறிச்சி அடைக்கல அன்னை ஆலயத்தில் ரூ. 1.38 கோடியில் பணிகள்: அமைச்சா் அடிக்கல்

அரியலூா் மாவட்டம், ஏலாக்குறிச்சி அடைக்கல அன்னை ஆலயத்தில் ரூ. 1.38 கோடியில் மேற்கொள்ளப்படும் வளா்ச்சிப் பணிகளுக்கு புதன்கிழமை அடிக்கல் நாட்டி தொடங்கிவைத்தாா் போக்குவரத்து மற்றும் மின்சாரத் துறை அமைச்சா் சா.சி.சிவசங்கா்.

அரியலூா் மாவட்டம், ரெங்கசமுத்திரம், சாத்தமங்கலம், செட்டிகுழி ஆகிய கிராமங்களில் புதன்கிழமை நடைபெற்ற நிகழ்ச்சியில் பங்கேற்ற அமைச்சா் சா.சி.சிவசங்கா், அங்கு நகரப் பேருந்து சேவையை தொடங்கிவைத்தாா். அதன்பிறகு, ஏலாக்குறிச்சி அடைக்கல அன்னை ஆலயத்தில் சுற்றுலாத்துறை சாா்பில் ரூ.1.38 கோடி மதிப்பில் பல்வேறு அடிப்படை வசதிகள் மேற்கொள்ளும் பணிக்கு அமைச்சா் சிவசங்கா் அடிக்கல் நாட்டி தொடங்கிவைத்தாா்.

இந்நிகழ்ச்சிகளுக்கு ஆட்சியா் பொ.ரத்தினசாமி தலைமை வகித்தாா். சட்டப் பேரவை உறுப்பினா் கு.சின்னப்பா முன்னிலை வகித்தனா். தமிழ்நாடு அரசு போக்குவரத்துக் கழகம் (கும்பகோணம்) நிா்வாக இயக்குநா் தசரதன், திருச்சி மண்டலம் பொது மேலாளா் சதீஸ்குமாா் உள்ளிட்டோா் கலந்து கொண்டனா்.