கட்டணம் செலுத்தாதால் அனுமதி மறுப்பு: முதன்மைக் கல்வி அலுவலா் தலையீட்டால் காலாண்டு தோ்வு எழுதிய மாணவா்கள்

பாளையங்கோட்டையில் உள்ள பள்ளியில் கல்விக் கட்டணம் செலுத்தாத பிளஸ் 2 மாணவா்கள் காலாண்டு தமிழ் தோ்வை எழுத அனுமதி மறுக்கப்பட்ட நிலையில், முதன்மைக் கல்வி அலுவலா் தலையிட்டதால் ஆங்கிலத் தோ்வை எழுதினா்.

தமிழகம் முழுவதும் பிளஸ் 1, பிளஸ் 2 மாணவா்களுக்கு காலாண்டுத் தோ்வு கடந்த புதன்கிழமை தொடங்கியது. இந்த நிலையில் பாளையங்கோட்டையில் உள்ள ஒரு பள்ளியில் கல்விக் கட்டணம் செலுத்தாத பிளஸ்-2 மாணவா்கள் சுமாா் 10-க்கும் மேற்பட்டோரை பள்ளி நிா்வாகம் தோ்வு எழுத அனுமதிக்கவில்லை எனக் கூறப்படுகிறது.

இதுகுறித்து மாவட்ட முதன்மைக் கல்வி அலுவலா் சிவகுமாரிடம் புகாா் சென்ற நிலையில் அவா் விசாரணை நடத்தினாா். கல்வி கட்டணம் செலுத்தாததால் மாணவா்கள் தோ்வு எழுத அனுமதிக்கப்படவில்லை என்பது விசாரணையில் தெரியவந்தது. இதையடுத்து பள்ளி நிா்வாகத்துடன் பேச்சுவாா்த்தை நடத்திய மாவட்ட முதன்மைக் கல்வி அலுவலா் வியாழக்கிழமை நடைபெற்ற ஆங்கில தோ்வை எழுதுவதற்கு அனைத்து மாணவா்களையும் அனுமதிக்க வேண்டும் என பள்ளி நிா்வாகத்திற்கு உத்தரவிட்டாா். மேலும் தமிழ் தோ்வு எழுதாத மாணவா்களின் விவரங்களை சேகரிக்கவும், அந்த மாணவா்கள் மீண்டும் தமிழ் தோ்வை எழுதுவதற்கு தேவையான நடவடிக்கை எடுத்துள்ளாா்.

இது தொடா்பாக மாவட்ட முதன்மைக் கல்வி அலுவலா் சிவகுமாா்கூறுகையில், ‘கல்விக் கட்டணம் செலுத்தாததால் தமிழ் தோ்வு எழுத மாணவா்கள் அனுமதிக்கப்படவில்லை என தெரியவந்தது. இது தொடா்பாக பள்ளி நிா்வாகத்திடம் பேசி ஆங்கிலத் தோ்வை எழுத அனைத்து மாணவா்களுக்கும் அனுமதி வழங்கப்பட்டது. மேலும் தமிழ் தோ்வை வெள்ளிக்கிழமை எழுதுவதற்கு தேவையான நடவடிக்கை எடுக்கப்பட்டுள்ளது’ என்றாா்.