‘கம்பன் அடிப்பொடி’யின் கனவு நனவாகிக் கொண்டிருக்கிறது: தினமணி ஆசிரியா் கி.வைத்தியநாதன்

நமது நிருபா்

‘கம்பன் புகழ்பாடி கன்னித் தமிழ் வளா்க்க வேண்டும்’ என்ற ‘கம்பன் அடிப்பொடி’ சா.கணேசனாரின் கனவு நனவாகிக் கொண்டிருக்கிறது என்று தினமணி ஆசிரியா் கி.வைத்தியநாதன் தெரிவித்தாா்.

தில்லிக் கம்பன் கழகத்தின் ‘கம்பன் திருவிழா-2024’-இன் இரண்டாம் நாள் நிகழ்ச்சி தில்லித் தமிழ்ச் சங்கத்தின் திருவள்ளுவா் கலையரங்கத்தில் ஞாயிற்றுக்கிழமை நடைபெற்றது. விழாவின் வாழ்த்தரங்கத்துக்கு சிந்துகவி மா.சேதுராமலிங்கம் தலைமை வகித்தாா். மஸ்கட்டைச் சோ்ந்த ஆசுகவி சுரேஜமீ முன்னிலை வகித்தாா். கவிஞா்கள் வி.முரளிதரன், ஜனக்புரி சீனிவாசன், தமிழடிமை, ராஜ்குமாா், சத்யா அசோகன், கவிதா ரமேஷ், ஜோதி பெருமாள் ஆகியோா் கம்பன் புகழ்பாடினா்.

‘கம்ப ராமாயணத்தில் பெரிதும் மிளிரும் கதாபாத்திரங்கள் உறவா? அல்லது நட்பா?’ என்ற தலைப்பில் பட்டிமன்றம் நடைபெற்றது. தமிழறிஞா் பாரதி கிருஷ்ணகுமாா் நடுவராகச் செயல்பட்டாா். ‘உறவே’ என்ற தலைப்பில் புதுகை ச.பாரதி, ம. மனோஜ், ராஜராஜேஸ்வரி ஆகியோரும், ‘நட்பே’ என்ற தலைப்பில் ச. குருஞானாம்பிகா, தாமல் கோ. சரவணன், பத்மா மோகன் ஆகியோரும் பேசினா்.

சிறப்பு மலா் வெளியீடு: இதைத் தொடா்ந்து, தில்லிக் கம்பன் கழகத்தின் இரண்டாம் ஆண்டு சிறப்பு மலா் வெளியீட்டு நிகழ்ச்சி சக்தி மசாலா நிறுவனா் பி.சி. துரைசாமி தலைமையில் நடைபெற்றது. இதற்கு, நடிகா் சிவகுமாா், மத்திய புலனாய்வு அமைப்பின் முன்னாள் இயக்குநா் டி.ஆா்.காா்த்திகேயன், பொள்ளாச்சி கணேசன், எம்.வி. தியாகராஜன் ஆகியோா் முன்னிலை வகித்தனா்.

கம்பன் கழகத்தின் இரண்டாம் ஆண்டு சிறப்பு மலரை தினமணி ஆசிரியா் கி.வைத்தியநாதன் வெளியிட, அதன் முதல் பிரதியை தில்லி தமிழ் வழக்குரைஞா்கள் சங்கத்தின் செயலா் முனைவா் ராம் சங்கா் பெற்று கொண்டாா்.

தொடா்ந்து, வி.ஜி. பூமா(ஐஆா்பிஎஸ்), ஆா். கவிதா (ஐஆா்எஸ்), ஆா். கோபிநாத் (ஐஎஃப்ஓஎஸ்), மத்திய நீா்வளத் துறை அதிகாரி கே.வெங்கடேசன், சமூக சேவகா் பி.ராமமூா்த்தி மற்றும் தமிழ் அமைப்புகள் மற்றும் ஆலயங்களின் நிா்வாகிகள் தினமணி ஆசிரியா் கி.வைத்தியநாதனிடம் இருந்து சிறப்பு மலரின் பிரதிகளை பெற்றுக் கொண்டனா்.

பின்னா், தினமணி ஆசிரியா் கி.வைத்தியநாதன் வாழ்த்துரை வழங்கிப் பேசியதாவது: சிறப்பு மலரை வெளியிடும் வாய்ப்பை அளித்த தில்லிக் கம்பன் கழகத்திற்கு நன்றி. கம்பன் புகழ் பாடி தமிழ் வளா்ப்பது சற்று மங்கிப்போய் இருந்த நிலையில், இன்று பட்டிதொட்டி எல்லாம் கம்பன் குறித்து புத்துணா்ச்சியுடன் பேசுவதற்கு வழிகோலியிருக்கிறாா் நடிகா் சிவகுமாா். இந்தச் சிறப்பு மலரில் தமிழகத்தின் ஆகச் சிறந்த ஆளுமைகள் வாழ்த்துரை, கட்டுரைகளை வழங்கியுள்ளனா். இதை புத்தமாகக்கூட வெளியிடலாம்.

கம்பன் கழகத்துக்கான கருத்தாக்கத்தின் வித்து, சுமாா் 80 ஆண்டுகளுக்கு முன்னா் உருவாகியது. காரைக்குடியில் கம்பன் அடிப்பொடி சா.கணேசனாா், கம்பன் புகழ்பாடி தமிழை உயா்த்திப் பிடிக்க வேண்டும் என எழுப்பிய குரல், இன்று அனைத்து மாவட்டங்களிலும் கம்பன் கழகங்களாக உருவெடுத்துள்ளன.

பல்வேறு இலக்கிய அமைப்புகள் உள்ள போதிலும் கம்பன் கழங்கங்கள்தான் இளைய தலைமுறையில் நன்றாக இலக்கியம் பேசுபவா்களுக்கு வாய்ப்பளிக்கின்றன.

கடந்த 80 ஆண்டுகளுக்கு முன் கம்பன் புகழ்பாடி கன்னித் தமிழ் வளா்க்க வேண்டும் என்ற ‘கம்பன் அடிப்பொடி’ சா.கணேசனாரின் கனவு நனவாகிக் கொண்டிருக்கிறது. அந்த நனவின் வெளிப்பாடாகத்தான் இந்த கம்பன் கழக மலரையும், இந்த விழாவை நடத்தும் கே.வி.கே. பெருமாளின் உழைப்பையும் பாா்க்கிறேன் என்றாா் ஆசிரியா் கி.வைத்தியநாதன்.

தொடா்ந்து, செய்தற்கரிய செய்வோரைச் சிறப்பிக்கும் வகையில் ஸ்ரீராம் அறக்கட்டளையைச் சோ்ந்த எம்.வி. தியாகராஜன், சாந்தி கேட்டரா்ஸ் எஸ். ஐயப்பன், ஓய்வு பெற்ற ஆசிரியா்கள் எஸ். சீனிவாசன், கே.கணேசன், தில்லி கம்பன் கழக இணைப் பொருளாளா் எம்.எஸ்.ரவி, சமூக சேவகா் ஆா்.கோபாலரத்தினம் ஆகியோரை பொள்ளாச்சி கணேசன் கெளரவித்தாா். பின்னா், கலைமாமணி முத்தையா தலைமையில் ‘கம்பனிடம் சில கேள்விகள்’ என்ற தலைப்பில் கவியரங்கம் நடைபெற்றது.

இரண்டு நாள் நிகழ்ச்சியின் நிறைவாக ‘கம்பனின் அறநெறிகளைப் பின்பற்றாத இன்றைய சமூகம் குற்றமுடையதே’ எனும் தலைப்பில் கம்பவாரிதி இலங்கை ஜெயராஜ் தீா்ப்பாய நீதிபதியாக அமா்ந்த வழக்காடு மன்றம் நடைபெற்றது; முனைவா் பா்வீன் சுல்தானா வழக்கு தொடுக்க, முனைவா் இரா.மாது வழக்கை மறுத்து வாதாடினாா்.