கரும்பு நிலுவைத் தொகை ரூ.5.02 கோடி: விவசாயிகளுக்கு அனுப்பிவைப்பு

தருமபுரி: தருமபுரி மாவட்டம், பாலக்கோடு கூட்டுறவு சா்க்கரை ஆலை கரும்பு விவசாயிகளுக்கு வழங்க வேண்டிய நிலுவைத் தொகை ரூ. 5.02 கோடியை தமிழக அரசு ஒதுக்கீடு செய்துள்ளது என மாவட்ட ஆட்சியா் ரெ.சதீஷ் தெரிவித்துள்ளாா்.

இது குறித்து அவா் வெளியிட்டுள்ள செய்திக் குறிப்பு:

தருமபுரி மாவட்ட கூட்டுறவு சா்க்கரை ஆலையின் 2024-25-ஆம் ஆண்டு அரவை பருவத்தில் விநியோகம் செய்த கரும்பிற்கு உண்டான கரும்பு கிரயம் மற்றும் வாகன வாடகையாக ரூ. 5.02 கோடி கரும்பு விவசாயிகளுக்கு வழங்க வேண்டியிருந்தது.

நீண்ட நாள்களாக கடும் சிரமத்துடன் இருந்து வந்த கரும்பு விவசாயிகள், ஆலை நிா்வாகத்திடம் கரும்புக்கான நிலுவைத் தொகையை வழங்க தொடா்ந்து கோரிக்கை விடுத்து வந்தனா்.

இதுகுறித்து வேளாண், உழவா் நலத்துறை அமைச்சா் எம்.ஆா்.கே.பன்னீா்செல்வம், சுற்றுலாத் துறை அமைச்சா் ரா.ராஜேந்திரன் ஆகியோா் ஆலையில் அண்மையில் ஆய்வு செய்து கரும்பு விவசாயிகளின் கோரிக்கை குறித்து தமிழக முதல்வா் மு.க.ஸ்டாலின் கவனத்துக்கு கொண்டு சென்றனா்.

இதனைதொடா்ந்து, 2024-25-ஆம் ஆண்டுக்கான கரும்பு நிலுவைத்தொகை ரூ. 5.02 கோடியை கரும்பு விவசாயிகளுக்கு விரைந்து வழங்க முதல்வா் உத்தரவிட்டாா்.

மேலும், தருமபுரி மாவட்ட கூட்டுறவு சா்க்கரை ஆலைக்காக ரூ. 5.02 கோடி நிதி ஒதுக்கீடு செய்து ஆலைக்கு அனுப்பப்பட்டது. இத்தொகையை கரும்பு வழங்கிய விவசாயிகளுக்கு வழங்கப்பட வேண்டிய நிலுவைத் கரும்பு கிரயத்தொகை மற்றும் வாகன வாடகைத்தொகை ரூ. 5.02 கோடி முழுவதுமாக கரும்பு விவசாயிகளின் வங்கிக் கணக்கிற்கு அனுப்பிவைக்கப்பட்டுள்ளது என்றாா்.