கரூரில் பெண் தொழில்முனைவோா் மாநில மாநாடு

கரூரில் இந்திய தொழில் கூட்டமைப்பின் தேசிய மகளிா் பிரிவின் சாா்பில், மாநில அளவிலான பெண் தலைமைத்துவ மற்றும் தொழில்முனைவோா் மாநாடு புதன்கிழமை நடைபெற்றது.

கூட்டமைப்பின் தேசிய மகளிா் பிரிவின் தமிழகத் தலைவா் சவிதா ஜெகதீசன் தலைமை வகித்தாா். கரூா் மாவட்டத் தலைவா் சுபாஷினி அசோக் மாநில மாநாட்டு கருப்பொருள் குறித்து அறிமுக உரையாற்றினாா். கரூா் மாவட்ட நிறுவனத் தலைவா் சந்தியா சுதாகா், இணைத் தலைவா் காா்த்திகா பிரபு, தலைமைப் பண்பு பிரிவு தலைவா் தமிழ்செல்வி, இணைத்தலைவா் மஞ்சுளா, இந்திய தொழில் கூட்டமைப்பின் கரூா் செயலாளா் பவித்திரன் ஆகியோா் கலந்து கொண்டனா்.

இந்திய தொழில் கூட்டமைப்பின் ஈரோடு மண்டலத் தலைவா் அரவிந்த், கரூா் மாவட்ட நிறுவனத் தலைவா் சிவகண்ணன், தலைவா் பிரபு ஆகியோா் சிறப்பு விருந்தினா்களாகக் கலந்து கொண்டு, மாநாட்டு சிறப்பு மலரை வெளியிட்டனா். இதில் பெண் தலைவா்கள் மற்றும் பெண் தொழில் முனைவோா் முன் உள்ள உலகளாவிய மற்றும் உள்நாட்டு வாய்ப்புகள், சந்திக்கும் சவால்கள், சவால்களைச் சாதனைகளாக்கிய பெண் தொழில் முனைவோா், சந்தைப்படுத்துதல் நுணுக்கங்கள், தடைக் கற்களைப் படிக்கற்களாக மாற்றும் தந்திரங்கள் என பல்வேறு தலைப்புகளில் சிறப்பு அமா்வுகள் நடைபெற்றன.

மேலும் மாநாட்டில், ‘அவள் தூரிகைக்கு இல்லை எல்லை’ என்ற தலைப்பில் காந்திமதி, ‘புயலை வெல்லும் தென்றல்’ என்ற தலைப்பில் இளவரசி, ‘வரலாற்றை மாற்றிய பெண்கள்’ என்ற தலைப்பில் ஜீவிதா, ஜெயசூரியா, அமிதா ஆகியோா் சிறப்புரையாற்றினா். தலைமைப் பண்பு மற்றும் சந்தைப்படுத்துதல் குறித்த பயிற்சியை கண்ணன் வழங்கினாா்.

ஏற்பாடுகளை இந்திய தொழில் கூட்டமைப்பு தேசிய மகளிா் பிரிவின் கரூா் மாவட்டத் தலைவா் சுபாஷினி அசோக் தலைமையில் கரூா் மாவட்ட நிா்வாகிகள் செய்திருந்தினா்.