கழிவுநீரால் மாசுபடும் கொடகனாறு!

கொடகனாற்றில் கலக்கும் கழிவுநீரால் விவசாயத்துக்குக்கூட தண்ணீரை பயன்படுத்த முடியவில்லை என விவசாயிகள் அதிருப்தி தெரிவித்தனா்.

திண்டுக்கல் மாவட்டத்தில் மஞ்சளாறு, மருதாநதி, குதிரையாறு, பாலாறு பொருந்தலாறு, பரப்பலாறு, நங்காஞ்சியாறு, கொடகனாறு, வரட்டாறு, சந்தனவா்த்தினி ஆறு என 10 ஆறுகள் பாய்ந்தாலும், கிழக்குப் பதியிலுள்ள ஒரே பிரதான ஆறு கொடகனாறு மட்டுமே. கீழ்பழனி மலையில் உருவாகும் இந்த ஆறு, ஆத்தூரை அடுத்த மலையடிவாரத்திலிருந்து அனுமந்தராயன்கோட்டை, திண்டுக்கல், தாடிக்கொம்பு, வேடசந்தூா் வழியாக அழகாபுரி அணைக்குச் சென்று, அங்கிருந்து கரூா் மாவட்டத்தில் உள்ள அமராவதி ஆற்றுடன் இணைந்து காவிரியில் கலக்கிறது.

மலையில் நீரோடையாகத் தொடங்கி ஆறாக உருமாறும் இடத்திலிருந்து அனுமந்தராயன்கோட்டை வரை சுமாா் 10 கி.மீ. தொலைவுக்கு தெளிவாக வரும் கொடகனாற்று நீா், திண்டுக்கல்லை அடுத்த பாலம் ராஜாக்காப்பட்டி அணைப்பட்டி முதல் கழிவுநீரின் சங்கமமாக மாறிவிடுகிறது. திண்டுக்கல் மாநகராட்சிப் பகுதியிலிருந்து வரும் கழிவுநீா் மட்டுமன்றி, தாடிக்கொம்பு, அகரம், வேடசந்தூா் பேரூராட்சிகளின் கழிவுநீரும், தாடிக்கொம்பு சுற்றுப்புறப் பகுதிகளிலுள்ள ஆலைகளின் ரசாயனக் கழிவுகளும் கலந்து கொடகனாற்றை மாசுப்படுத்தி வருவதாக பொதுமக்கள் தொடா்ந்து குற்றச்சாட்டை முன்வைக்கின்றனா். உள்ளாட்சி அமைப்புகள் சாா்பில் முறையாகவும், முழுமையாகவும் சுத்திகரிப்பு செய்யப்படாத கழிவுநீா் ஆற்றில் கலப்பதால், அனுமந்தராயன்கோட்டைக்கு பின் இந்த ஆற்று நீரை விவசாயத்துக்குக்கூட பயன்படுத்த முடியாத நிலை ஏற்படுவதாக விவசாயிகள் குற்றஞ்சாட்டுகின்றனா்.

தாடிக்கொம்பு, அகரம், வேடசந்தூா் பேரூராட்சிகள் சாா்பில், திரவ கழிவுநீா் மேலாண்மைத் திட்டத்தின் கீழ், கழிவுநீா் சுத்திகரிப்பு கட்டமைப்புகள் பல லட்சம் ரூபாய் மதிப்பீட்டில் கட்டப்பட்டன. ஆனால், திரவ கழிவுநீா் மேலாண்மைக் கட்டமைப்புகள் காட்சிப் பொருளாக மட்டுமே உள்ளன. இவை முறையாக பராமரிக்கப்படுவதுமில்லை, பயன்படுத்தப்படுவதுமில்லை என கூறப்படுகிறது.

கண்டுகொள்ளாத மாசுக் கட்டுப்பாட்டு வாரியம்: உள்ளாட்சி அமைப்புகள் மூலம் வெளியேற்றப்படும் கழிவுநீா், ஆலைகளிலிருந்து வெளியேற்றப்படும் ரசாயன கழிவுகள் உள்ளிட்டவற்றை கண்காணிக்க வேண்டிய மாசுக் கட்டுப்பாட்டு வாரியம், இந்த விவகாரத்தில் முழுமையாக கவனம் செலுத்துவதில்லை. குறைதீா் முகாம்களின் போது, கொடகனாற்றில் கழிவுநீா் கலப்பதாக விவசாயிகள் புகாா் தெரிவிக்கும் போதெல்லாம், மாசுக்கட்டுப்பாட்டு வாரிய அலுவலா்கள் ஆய்வு செய்யப்படும் என்ற ஆயத்த பதிலை கூறுவதையே வழக்கமாகக் கொண்டுள்ளனா். ஆனால், கழிவுகள் கலப்பதைத் தடுக்க ஆக்கபூா்வமான நடவடிக்கைகளை மேற்கொள்ளவதில்லை என புகாா் எழுந்திருக்கிறது.

உரிமம் வழங்க மட்டுமே முக்கியத்துவம்: இதுதொடா்பாக கொடகனாறு பாதுகாப்பு சங்கத் தலைவா் த.ராமசாமி கூறியதாவது:

கொடகனாற்றை மாசுப்படுத்தும் உள்ளாட்சி அமைப்புகள், தனியாா் ஆலைகள் குறித்து மாசுக் கட்டுப்பாட்டு வாரிய அதிகாரியிடம் புகாா் அளித்தால், சம்பந்தப்பட்ட இடத்தில் ஆய்வு நடத்துவதற்கு வருகின்றனா். கழிவுநீா் கலந்த ஆற்று நீரைச் சேகரித்து பகுப்பாய்வுக்கு அனுப்புகின்றனா். ஆனால், இதுவரை அதற்கான முடிவுகள் குறித்து தகவல் தெரிவிக்கவும் இல்லை, கழிவுகள் கலப்பதைத் தடுப்பதற்கு நடவடிக்கை எடுக்கவும் இல்லை. இதனால், ஆற்று நீரை நேரடியாகப் பயன்படுத்த முடியவில்லை. மேலும், நிலத்தடி நீரும் மாசடைந்துவிட்டது.

மாசுக் கட்டுப்பாட்டு வாரியத்தை பொருத்தவரை, கனிம வளங்கள் எடுப்பதற்கான உரிமம் வழங்குவதற்கே முக்கியத்துவம் அளிக்கப்படுகிறது. கோட்டையூா் பகுதியிலுள்ள தனியாா் ஆலைகள் கழிவுநீரை அதன் வளாகத்திலேயே சேமித்து வைக்கின்றனா். மழைக் காலங்களில், மழைநீரோடு வெளியேற்றிவிடுகின்றனா். இந்த புகாா் குறித்தும் இதுவரை நடவடிக்கை எடுக்கவில்லை.

தற்போது புதிதாக பொறுப்பேற்ற மாவட்ட ஆட்சியா் செ.சரவணன், சென்னை பெருநகர குடிநீா் வழங்கல், கழிவுநீரகற்று வாரியத்தில் நிா்வாக இயக்குநராகப் பணியாற்றியவா். எனவே, கொடகனாறு மாசுபடுவதைத் தடுக்க உரிய நடவடிக்கை எடுப்பாா் என எதிா்பாா்க்கிறோம் என்றாா்.

இதுகுறித்து மாவட்ட சுற்றுச்சூழல் அலுவலா் குணசேகரனிடம் கேட்டபோது, ஆற்றில் கழிவுநீா் கலப்பதைத் தடுக்க வேண்டிய பொறுப்பு உள்ளாட்சி அமைப்புகளிடம் உள்ளது. இதில் நாங்கள் எதுவும் செய்ய முடியாது என்றாா்.