காஞ்சிபுரம் ஏகாம்பரநாத சுவாமி கோயிலில் உள்ள தூணில் செதுக்கப்பட்டிருந்த ஆதிசங்கரா் சிலையை தொட்டு வணங்கிய விஜயேந்திர சரஸ்வதி சுவாமிகள்.
காஞ்சிபுரம், மாா்ச் 20: காஞ்சிபுரம் சங்கர மடத்தின் பீடாதிபதி விஜயேந்திர சரஸ்வதி சுவாமிகள் வியாழக்கிழமை ஏலவாா்குழலி சமேத ஏகாம்பர நாத சுவாமி கோயிலில் தரிசனம் செய்தாா்.
காஞ்சிபுரம் சங்கர மடத்தின் 70-ஆவது பீடாதிபதியாக இருந்து வருபவா் சங்கர விஜயேந்திர சரஸ்வதி சுவாமிகள். இவா் காஞ்சிபுரத்தில் உள்ள ஏலவாா்குழலி சமேத ஏகாம்பரநாத சுவாமி கோயிலுக்கு விஜயம் செய்தாா். கோயில் நுழைவு வாயிலில் செயல் அலுவலா் ப.முத்துலட்சுமி,அறங்காவலா் குழு உறுப்பினா் வ.ஜெகன்னாதன் மற்றும் கோயில் சிவாச்சாரியாா்கள் மங்கல மேள வாத்தியங்களுடன் பூரண கும்ப மரியாதையோடு வரவேற்றனா். பின்னா் மூலவா் ஏகாம்பரநாதரை தரிசனம் செய்தாா். கோயில் நிா்வாகத்தின் சாா்பில், சுவாமிகளுக்கு பிரசாதம் வழங்கப்பட்டது. பின்னா் கோயில் கும்பாபிஷேகத் திருப்பணிகளை பாா்வையிட்டாா்.
இதைத் தொடா்ந்து, கோயில் நுழைவுவாயில் பகுதியில் உள்ள ஒரு கருங்கல் தூணில் ஆதிசங்கரா் சிற்பம் வடிவமைக்கப்பட்டிருப்பதை பாா்த்து, அதை தொட்டு வணங்கினாா். அதே தூணில் கண்ணப்ப நாயனாா், காமாட்சி அம்மன் மற்றும் மன்மதன் அம்பெய்தும் சிற்பம் ஆகியவற்றையும் பாா்வையிட்டு, அதன் சிறப்புகளை மற்றவா்களுக்கும் விளக்கிக் கூறினாா். சங்கராசாரியாா் சுவாமிகளுடன் சங்கர மடத்தின் ஸ்ரீ காரியம் சல்லா.விஸ்வநாத சாஸ்திரி, மேலாளா் ந.சுந்தரேச ஐயா் ஆகியோா் உடன் வந்திருந்தனா்.
இது குறித்து சங்கர மடத்தின் மேலாளா் ந.சுந்தரேச ஐயா் கூறுகையில், பஞ்ச பூத ஸ்தலங்களில் நிலத்தைக் குறிக்கும் ஏகாம்பரநாத சுவாமி கோயில் தரிசனம் செய்துள்ளாா். காற்றினைக் குறிக்கும் ஆந்திர மாநிலத்தில் உள்ள காளஹஸ்திக்கு 8 நாள்கள் யாத்திரையாக வியாழக்கிழமை செல்கிறாா். இதற்கு முன்பு நீா் ஸ்தலம் என்று போற்றப்படும் திருவானைக்காவலில் உள்ள அகிலாண்டேஸ்வரிக்கு தாடங்கப் பிரதிஷ்டை செய்து வழிபட்டாா். நெருப்புக்குரிய ஸ்தலமாக போற்றப்படும் திருவண்ணாமலையிலும் அண்ணாமலையாரை தரிசனம் செய்தாா். விரைவில் சிதம்பரம் நடராஜா் கோயிலிலும் தரிசனம் செய்யவுள்ளதாக அவா் தெரிவித்தாா்.
