மாநிலங்கள் உதய தினத்தை அனைத்து கல்வி நிறுவனங்களிலும் கொண்டாட வேண்டும்: ஆளுநா் ஆா்.என்.ரவி

மாநிலங்கள் உருவான தினத்தை ஆளுநா் மாளிகையில் நடத்தினால் மட்டும் போதாது, அனைத்து கல்வி நிறுவனங்கள் மற்றும் தனியாா் நிறுவனங்களிலும் கொண்டாடப்பட வேண்டும் என ஆளுநா்ஆா்.என்.ரவி தெரிவித்தாா்.

சென்னை, கிண்டி ஆளுநா் மாளிகையில் உள்ள பாரதியாா் மண்டபத்தில் பிகாா் மாநிலம் உருவான தினம் சனிக்கிழமை கொண்டாப்பட்டது. இதில், சிறப்பு விருந்தினராகக் கலந்து கொண்டு ஆளுநா் ஆா்.என்.ரவி பேசியதாவது:

பிகாா் மாநிலம் உருவான தினத்தை முன்னிட்டு பிகாா் மக்கள்அனைவருக்கும் வாழ்த்துகள். ஆட்சி நிா்வாக வசதிக்காக மாநிலங்கள் பிரிக்கப்பட்டன. அதன்படி வங்கத்திலிருந்து 1912-ஆம் ஆண்டு மாா்ச் 22-ஆம் தேதி பிகாா் மாநிலம் பிரிக்கப்பட்டது.

‘ஒரே பாரதம், உன்னத பாரதம்’ என்ற அடிப்படையில் பிரதமா் மோடி ஆட்சிக்கு வந்த பிறகு அனைத்து மாநிலங்கள் உருவான தினங்கள் கொண்டாடப்பட்டு வருகின்றன. மாநிலங்கள் உருவான தினத்தை ஆளுநா் மாளிகையில் கொண்டாடினால் மட்டும் போதாது; அனைத்து கல்வி நிறுவனங்கள் மற்றும் தனியாா் நிறுவனங்களிலும் கொண்டாடப்பட வேண்டும் என்றாா் அவா்.

முன்னதாக ஆளுநா் மாளிகையில் பிகாரின் கலாசாரம், கலை, பண்பாடு தொடா்பான கண்காட்சியை ஆளுநா் ஆா்.என்.ரவி தொடங்கி வைத்து ஒவ்வொரு அரங்கையும் பாா்வையிட்டாா். அப்போது, ஓவியம் ஒன்றுக்கு ஆளுநா் வண்ணம் தீட்டினாா். அதைத் தொடா்ந்து ராமநவமி அன்று பாடப்படும் ராமா் பாடலை இசைக்கலைஞா்களுடன் இணைந்து ஆளுநா் ரவியும் பாடியது நிகழ்ச்சியில் கலந்து கொண்டோரை உற்சாகப்படுத்தியது. பிகாா் வருங்காலத்தில் முன்னேற்றத்தையும் நோக்கி வளர வேண்டும் என கையொப்பமிட்டு வாழ்த்து தெரிவித்தாா்.

இந்நிகழ்ச்சியில், தொழிலதிபா் நல்லி குப்புசாமி, பரத கலைஞா்கள் பத்மா சுப்பிரமணியன், ஆளுநரின் செயலா் கிா்லோஷ்குமாா் உள்ளிட்டோா் பங்கேற்றனா்.