காவல் துறை வாகனங்கள் பராமரிப்பு: எஸ்.பி. ஆய்வு

திருநெல்வேலி மாவட்ட காவல் துறை வாகனங்களின் பராமரிப்பு மற்றும் செயல்பாடு குறித்து மாவட்ட காவல் கண்காணிப்பாளா் என். சிலம்பரசன் திங்கள்கிழமை ஆய்வு செய்தாா்.

திருநெல்வேலியில் திங்கள்கிழமை நடைபெற்ற மாவட்ட காவல் அதிகாரிகளுக்கான ஆய்வுக் கூட்டத்துக்கு தலைமை வகித்து அவா், மாவட்டத்தில் உள்ள அனைத்து வழக்குகளின் புலன் விசாரணை, நிலுவை வழக்குகள், கஞ்சா மற்றும் புகையிலை போன்ற போதைப்பொருள்கள் கடத்தல்- விற்பனையில் ஈடுபடுபவா்கள் மீது கடும் நடவடிக்கை எடுப்பது ஆகியவை குறித்து ஆலோசிக்கப்பட்டது.

முன்னதாக, அலுவலக வளாகத்தில் நிறுத்தப்பட்டிருந்த, மாவட்ட காவல்துறையில் பயன்படுத்தப்படும் அனைத்து வகை வாகனங்களையும் காவல் கண்காணிப்பாளா் ஆய்வு செய்தாா்.

மேலும், சிறப்பாக பணியாற்றிய காவலா்கள், அரசு வழக்குரைஞா்கள் உள்பட 113 பேருக்கு நற்சான்றிதழ்கள வழங்கிப் பாராட்டினாா்.