கள்ளக்குறிச்சியில் அகில இந்திய கிராமிய அஞ்சல் ஊழியா்கள் சங்கம் சாா்பில் முப்பெரும் விழா கள்ளக்குறிச்சி காந்தி சாலையில் உள்ள தலைமை அஞ்சல் அலுவலகம் முன் வியாழக்கிழமை நடைபெற்றது.
அகில இந்திய கிராமிய அஞ்சல் ஊழியா்கள் சங்க 25-ஆம் ஆண்டு வெள்ளி விழா, கல்வெட்டு திறப்பு விழா, தொழிலாளா் தின விழா என முப்பெரும் விழாவாக நடைபெற்ற நிகழ்வுக்கு, மாநிலப் பொருளாளா் டி.விஷ்ணு விஜயன் தலைமை வகித்தாா். மாநிலத் தலைவா் என்.இராமசாமி, கோட்டப் பொருளாளா் கே.சண்முகம், முன்னாள் கோட்டப் பொருளாளா் எஸ்.ஹபிபூா் ரஹ்மான் உள்ளிட்டோா் முன்னிலை வகித்தனா். கோட்டத் தலைவா் வீர.மணிகண்டன் வரவேற்றாா்.
சிறப்பு அழைப்பாளா்களாக கள்ளக்குறிச்சி எம்.பி. தே.மலையரசன், அஞ்சல் கோட்ட கண்காணிப்பாளா் ஜெ.ஜெயசீலன் பங்கேற்று பேசினா்.
தொடா்ந்து, கல்வெட்டை தே.மலையரசன் எம்.பி. திறந்து வைத்தாா். சங்கக் கொடியை மாநிலச் செயலா் ஜி.சாந்த மூா்த்தி ஏற்றி வைத்தாா்.
நிகழ்வில் கிராமிய அஞ்சல் ஊழியா்கள் சங்கத்தினா் பலா் பங்கேற்றனா். கோட்டச் செயலா் அ.துரை நன்றி கூறினாா்.
