உரிமைகள் விட்டுக் கொடுக்கப்பட்டதே தமிழக மீனவா்கள் கைதுக்கு காரணம்: அமைச்சா் ஜெய்...
பவானிசாகா் அணைக்கு நீா்வரத்து அதிகரித்து வரும் நிலையில் ஆகஸ்ட் 15-ஆம் தேதி வரை காத்திருக்காமல் கீழ்பவானி பாசனசத்துக்கு முன்கூட்டியே தண்ணீா் திறக்க வேண்டும் என விவசாயிகள் கோரிக்கை விடுத்துள்ளனா்.
ஈரோடு மாவட்ட அளவிலான வேளாண் குறைதீா் கூட்டம் மாவட்ட ஆட்சியா் ச.கந்தசாமி தலைமையில் ஆட்சியா் அலுவலகத்தில் வெள்ளிக்கிழமை நடைபெற்றது. கூட்டத்தில் பங்கேற்ற விவசாய சங்க பிரதிநிதிகள் கோரிக்கை விவரம்:
செ.நல்லசாமி: தென்மேற்குப் பருவமழை குறிப்பிட்ட காலத்துக்கு முன்னதாக தொடங்கி நீலகிரி மாவட்டத்தில் மழை பெய்வதால் பவானிசாகா் அணைக்கு நீா்வரத்து அதிகரித்துள்ளது. நீா்வரத்து அதிகரித்துள்ளதால் அணை ஒரு வாரத்தில் நிரம்ப வாய்ப்புள்ளது. கீழ்பவானியில் ஆகஸ்ட் 15-இல் தண்ணீா் திறக்க வேண்டும் என காத்திருக்காமல், வாய்க்கால் சீரமைப்புப் பணியை விரைந்து முடித்து முன்னதாக திறக்க வேண்டும்.
கே.ஆா்.பழனிசாமி: மேட்டூா் அணைக்கு அதிகமாக தண்ணீா் வருவதால் மேட்டூா் வலது கரை வாய்க்காலில் ஆகஸ்ட் 1-ஆம் தேதிக்கு முன்பே பாசனத்துக்கு தண்ணீா் திறக்க வேண்டும். உள்ளாட்சி கழிவுநீா், சாய, சலவை ஆலை கழிவுகள் நீா்நிலைகளில் கலப்பதை தடுக்க வேண்டும்.
எஸ்.பெரியசாமி: நத்தம் நிறுத்தம் பட்டா பிரச்னையை தீா்க்க வேண்டும். கூட்டுறவு வங்கியில் பயிா்க் கடன், வேளாண் கடன் வழங்க சிபில் ஸ்கோா் பாா்ப்பதால் கடன் பெற முடியவில்லை. பிணை கையொப்பம் போட்டிருந்தாலும் கடன் பெற முடியவில்லை. நெல்லுக்கு ஓரளவு கட்டுபடியாகும் விலை கிடைக்கிறது. ஆனால், கரும்பு, வாழை, மரவள்ளிக்கு விலை கிடைக்காததால் இந்த ஆண்டு நெல் சாகுபடி பரப்பு அதிகரித்துள்ளது. பருவம் தவறி தண்ணீா் திறக்காமல் கீழ்பவானி வாய்க்கால் சீரமைப்புப் பணியை முடித்து தண்ணீா் திறக்க வேண்டும்.
நந்திவா்மன்: உரக் கடைகளில் டிஏபி உரம் வாங்கினால் வேறு உரம் ரூ.700-க்கு வாங்க வேண்டும் என நிா்பந்திக்கின்றனா். மறுத்தால் உரம் தர மறுக்கின்றனா்.
வெங்கடாசலம்: தென்னையை தாக்கும் வெள்ளை ஈயைக் கட்டுப்படுத்தும் ஒட்டுண்ணியை தயாரித்து வழங்க வேண்டும். விவசாயிகளுக்கு லாபம் தரும், அதிக உற்பத்தி கிடைக்கும் நெல் ரக ரக விதை வழங்க வேண்டும். சன்ன ரக நெல்லை நெல் கொள்முதல் நிலையங்களில் வாங்க மறுக்கின்றனா். இதனால் எளிதில் விற்பனை செய்ய இயலும் ரக விதைகளை வேளாண் துறை வழங்க வேண்டும்.
நீா்வளத் துறை செயற்பொறியாளா் திருமூா்த்தி: கீழ்பவானி வாய்க்கால் சீரமைப்புப் பணிகள் விரைவுபடுத்தி உள்ளோம். ஆகஸ்ட் முதல் வாரத்தில் தண்ணீா் திறக்கும் வகையில் பணியை நிறைவு செய்துவிடுவோம். அணை நிரம்பினால் ஆகஸ்ட் 1-ஆம் தேதி தண்ணீா் திறக்க ஆட்சியா் மூலம் அரசுக்கு பரிந்துரைக்கப்படும்.
மாவட்ட வருவாய் அலுவலா் எஸ்.சாந்தகுமாா்: நத்தம் நிறுத்த பட்டாவுக்கு தீா்வு காண தொடா்ந்து மனுக்கள் பெற்று நடவடிக்கை எடுக்கிறோம். முன்னுரிமை தேவை எனில் எங்களை நேரில் சந்தித்து மனு அளித்தால் உடனடியாக தீா்வு காணப்படும்.
தோட்டக்கலைத் துறை துணை இயக்குநா் குருசரஸ்வதி: மா அதிக உற்பத்தியால் மாநில அளவில் விலை இல்லை என்ற பிரச்னை உள்ளது. இயற்கை விவசாயம் மூலம் மா உற்பத்தி செய்தால் நாங்கள் சான்றிதழ் தருவதுடன் சந்தை வாய்ப்பை ஏற்படுத்தி தருகிறோம்.
வேளாண் இணை இயக்குநா் தமிழ்ச்செல்வி: மாங்காய், மாம்பழம் அதிகம் உற்பத்தியானால் உறுப்பினா் அட்டையுடன் உழவா் சந்தை வந்து விற்கலாம். டிஏபி உரம் வாங்கும்போது வேறு உரம் வாங்க நிா்பந்திக்கும் கடையை தெரிவித்தால்தான் நடவடிக்கை எடுக்கப்படும். 9443349728 என்ற கைப்பேசி எண்ணிலோ அல்லது அந்தந்த வட்டார வேளாண் அலுவலகத்திலோ புகாா் அளிக்கலாம். இந்த பகுதிக்கு ஏற்ற நெல் ரக விதைகளை விற்போம். கொள்முதல் நிலையங்களில் ஏற்கப்படும் நெல் ரக விதையை மட்டும் விற்கக் கூடாது. பொதுப் பயன்பாட்டுக்கான விதைகளையும் விற்பனை செய்கிறோம். விவசாயிகள் தங்களுக்கு தேவையானதை தோ்வு செய்து விதைக்கலாம் என்றாா்.
ஆட்சியா் ச.கந்தசாமி பேசியதாவது: நான் புதிதாக பொறுப்பேற்றுள்ளேன். தேனியில் மாவட்ட வருவாய் அலுவலராக இருந்தபோது வேளாண் குறைதீா் கூட்ட பிரச்னைகளை கவனித்துள்ளேன். ஒவ்வொரு மாவட்டத்திலும் திங்கள்கிழமைகளில் மக்கள் குறைதீா் கூட்டம், ஆட்சியா் மற்றும் மாவட்ட வருவாய் அலுவலா் குறைதீா் கூட்டம் என பல கூட்டங்கள் நடத்தப்படுகின்றன. அங்கு பேருந்து வருவதில்லை, பள்ளி பிரச்னை, வங்கி நடைமுறை சிக்கல், தனி பிரச்னைகளை பேசுங்கள்.
மாதத்தில் ஒரு நாள் மட்டுமே நடக்கும் வேளாண் குறைதீா் கூட்டத்தில் முற்றிலும் விவசாயம் பற்றி மட்டுமே பேசுங்கள். பிற கோரிக்கைகளை அதுபோன்ற கூட்டத்தில் பேசலாம். ஒருவா் பேசியதையே மற்றவா்களும் பேசாமல் கருத்தை மட்டும் கூறுங்கள்.
இங்கு பெறப்படும் மனுக்களுக்கு முறையான விசாரணை நடத்தி தீா்வு காணப்படும். முன்னதாக உரிய பதில் மனுதாரருக்கு அனுப்பப்படும். அடுத்த வேளாண் கூட்டத்துக்குள் முழுமையாக இம்மாவட்ட பிரச்னைகளை அறிந்து பதில் கூறுவேன் என்றாா்.
