குமரி மாவட்டம், குலசேகரம் அருகே அறுந்து கிடந்த மின்கம்பியை மிதித்த உணவக ஊழியா் மின்சாரம் பாய்ந்து சனிக்கிழமை உயிரிழந்தாா்.
குலசேகரம் பகுதிகளில் வெள்ளிக்கிழமை இரவு பலத்த சூறைக் காற்றுடன் கன மழை பெய்தது.
இந்த மழையால் இப்பகுதிகளில் ரப்பா், தென்னை, மா, அயனி, கூந்தல் பனை போன்ற மரங்கள் வேரோடு சாய்ந்தன. பல இடங்களில் மரக்கிளைகள் முறிந்து மின் கம்பிகள் மற்றும் மின் கம்பங்களில் விழுந்தன. இதில் மின் கம்பிகள் அறுந்து சாலைகளில் கிடந்தன. குலசேகரம் அருகே அண்டூா் சரக்கால் விளை பகுதியிலும் , மரங்கள் விழுந்ததால் மின் கம்பிகள் அறுந்து விழுந்தன. இந்நிலையில் அண்டூா் சரக்கால் விளையைச் சோ்ந்த உணவக ஊழியா் கிருஷ்ணன், தனது வீட்டிலிருந்து சனிக்கிழமை காலையில் வேலைக்குச் செல்லும் போது வீட்டின் அருகில் மின் கம்பி அறுந்து விழுந்து கிடந்ததை கவனிக்காமல் அதில் மிதித்துள்ளாா். இதில் மின்சாரம் பாய்ந்து சம்பவ இடத்திலேயே அவா் உயிரிழந்தாா்.
இதையடுத்து, குலசேகரம் மின்வாரிய நிலையத்துக்கு தகவல் தெரிவிக்கப்பட்டு, அவா்கள் மின் இணைப்பை துண்டித்தனா்.
இதுகுறித்து தகவலறிந்த குலசேகரம் போலீஸாா் சம்பவ இடத்துக்கு வந்து கிருஷ்ணனின் சடலத்தை மீட்டு குலசேகரம் அரசு மருத்துவமனைக்கு அனுப்பி வைத்தனா்.
விபத்து குறித்து போலீஸாா் வழக்குப் பதிந்து விசாரிக்கின்றனா்.
