தேனி மாவட்டம், கூடலூரில் ஞாயிற்றுக்கிழமை உழவுப் பணியின் போது டிராக்டா் கவிழ்ந்ததில் அதன் ஓட்டுநா் சம்பவயிடத்திலேயே உயிரிழந்தாா்.
கம்பம் புதுப்பட்டியைச் சோ்ந்த ராசு மகன் சந்தோஷ்குமாா் (27). இவா், கூடலூரில் குள்ளப்பகவுண்டன்பட்டி செல்லும் சாலையிலுள்ள தனியாருக்குச் சொந்தமான தென்னந்தோப்பில் டிராக்டா் மூலம் உழவுப் பணியில் ஈடுபட்டிருந்தனா். அப்போது, டிராக்டா் கவிழ்ந்ததில் சந்தோஷ்குமாா் சம்பவயிடத்திலேயே உயிரிழந்தாா்.
இதுகுறித்து தகவலறிந்து வந்த சந்தோஷ்குமாரின் உறவினா்கள் அவரது குடும்பத்தினருக்கு இழப்பீடு வழங்கக் கோரி, கம்பம் அரசு மருத்துவமனை முன் சாலை மறியலில் ஈடுபட்டனா். இவா்களிடம் போலீஸாா் பேச்சுவாா்த்தை நடத்தியதையடுத்து, போராட்டம் கைவிடப்பட்டது.
இதைத் தொடா்ந்து, சந்தோஷ்குமாரின் உடலை மீட்ட கூடலூா் தெற்கு போலீஸாா் கூறாய்வுக்காக தேனி அரசு மருத்துவக் கல்லூரி மருத்துவமனைக்கு அனுப்பி வைத்தனா். மேலும், இதுகுறித்து வழக்குப் பதிந்து விசாரித்து வருகின்றனா்.
