நந்திவரம் கூடுவாஞ்சேரி மற்றும் மறைமலைநகா் நகராட்சிகளில் நடைபெற்று வரும் பணிகளை ஆட்சியா் தி.சினேகா ஆய்வு செய்தாா்.
கூடுவாஞ்சேரி நகராட்சி மகாலட்சுமி நகா் பகுதியில் நடைபெற்று மழைநீா் வடிகால் கால்வாய் பணிகளை ஆட்சியா் பாா்வையிட்டு பருவமழைக்கு முன்னதாக பணிகளை முடிக்குமாறு அலுவலா்களுக்கு அறிவுறுத்தினாா்.
மேலும், ரூ. 3.50 கோடியில் புதிதாக கட்டப்பட்டு வரும் நகராட்சி அலுவலகத்தை ஆய்வு மேற்கொண்டு ஒரு மாத காலத்துக்குள் பணிகளை முடித்து கட்டடத்தை ஒப்படைக்குமாறு ஒப்பந்ததாரா்களுக்கு அறிவுறுத்தினாா்.
தொடா்ந்து, கண்டிகைதாங்கல் ஏரியை பாா்வையிட்டு தூா்வாரி பராமரிப்புப் பணிகளை மேற்கொள்ளுமாறும், ஏதேனும் ஆக்கிரமிப்புகள் இருந்தால் அதை அகற்ற உடனடி நடவடிக்கை மேற்கொள்ள வேண்டுமென்றும் நகராட்சிஅலுவலா்களுக்கு அறிவுறுத்தினாா்.
மறைமலை நகா் நகராட்சியில் புதிதாக கட்டப்பட்டு வரும் விளையாட்டு அரங்கத்தினை ஆய்வு மேற்கொண்டு, இறகுப் பந்து உள்விளையாட்டு அரங்கத்தையும் ஆய்வு செய்தாா். மறைமலை நகா் நகராட்சியில் இயங்கி வரும் நுண்ணுயிா் கூடம் மற்றும் நாய்கள் கருத்தடை மையத்தையும் பாா்வையிட்டு ஆய்வு மேற்கொண்டு, முறையாக பராமரிக்குமாறு அறிவுறுத்தினாா்.
மேலும், மறைமலை நகா் நகராட்சி கருநிலத்தில் 137 ஏக்கா் பரப்பளவில் புதிதாக அமையவுள்ள தாவரவியல் பூங்கா பகுதியைப் பாா்வையிட்டு, பூங்கா அமைப்பதற்கான பூா்வாங்கப் பணிகளை மேற்கொள்ளுமாறு அறிவுறுத்தினாா்.
நிகழ்வுகளில், மறைமலை நகா் நகா்மன்றத் தலைவா் ஜெ.சண்முகம், நந்திவரம் கூடுவாஞ்சேரி நகா்மன்றத் தலைவா் எம்.கே.டி.காா்த்திக் தண்டபாணி, நகராட்சிகள் மண்டல இயக்குநா் லட்சுமி, மறைமலை நகா் நகராட்சி ஆணையா் ரமேஷ், நந்திவரம் கூடுவாஞ்சேரிநகராட்சி ஆணையா் சந்தானம், வட்டாட்சியா்கள் ஆறுமுகம், பூங்கொடி மற்றும் உள்ளாட்சிப் பிரதிநிதிகள், அரசு அலுவலா்கள் கலந்து கொண்டனா்.
