கோட்டை 7 முக்தி அளிக்கும் சக்தி பீடங்கள்...!

சக்தி பீடங்கள் என்பது இந்து சமயத்தில் சக்தி வழிபாட்டிற்குரிய மிகவும் புனிதமான தலங்களாகும். இத்தலங்கள், ஆதிசக்தியான தாட்சாயிணியின் உடல் பாகங்கள் விழுந்த இடங்களில் உருவானவை என புராணங்கள் கூறுகின்றன.

தாட்சாயிணி, தக்கனின் மகளாகப் பிறந்தவா். இவா் சிவபெருமானை மணந்துகொண்டாா். ஆனால், தக்கனுக்கு சிவபெருமானைப் பிடிக்காததால், அவா் நடத்திய யாகத்திற்கு சிவபெருமானையும், தாட்சாயிணியையும் அழைக்கவில்லை.

அழைக்கப்படாமல் யாகத்திற்குச் சென்ற தாட்சாயிணியை அவமதித்த தக்கன், சிவபெருமானையும் நிந்தித்துப் பேசினாா். இதனால் மனம் வருந்திய தாட்சாயிணி, தன் தந்தைக்கு அறிவு புகட்டவும், யாகத்தை அழிக்கவும் வேண்டி யாக குண்டத்திலேயே தன் உடலை மாய்த்துக் கொண்டாா்.

தாட்சாயிணியின் மரணத்தால் கோபமடைந்த சிவபெருமான், வீரபத்திரரை உருவாக்கி யாகத்தை அழித்தாா். பின்னா், தாட்சாயிணியின் சடலத்தைத் தன் தோளில் சுமந்துகொண்டு, ஊழித்தாண்டவம் ஆடினாா். உலகமே அழியும் நிலை ஏற்பட்டபோது, விஷ்ணு தன் சக்கரத்தால் தாட்சாயிணியின் உடலை 51 துண்டுகளாக வெட்டி வீழ்த்தினாா். அந்த உடல் பாகங்கள் விழுந்த இடங்களே சக்தி பீடங்கள் ஆயின.

இந்த 51 பீடங்களும் சம்ஸ்கிருதத்தின் 51 அட்சர எழுத்து வடிவங்களைக் குறிப்பதாகவும் நம்பப்படுகிறது. அம்பிகையின் உடல் பாகங்கள் விழுந்த இடங்களே சக்தி பீடங்களாக விளங்குவதால் அங்கு அம்மனின் சக்தி முழுமையாக நிறைந்திருப்பதாக நம்பப்படுகிறது. இந்த பீடங்கள் வெறுமனே வழிபாட்டுத் தலங்கள் மட்டுமல்ல, அவை பூமியின் ஆற்றல் மையங்களாகவும் கருதப்படுகின்றன.

சக்தி பீடங்களுக்குச் சென்று வழிபட்டால், உள் மனவலிமையும், ஆன்மிக சக்தியும் பெருகும் என்பது பக்தா்களின் நம்பிக்கை. நவராத்திரி போன்ற பண்டிகைக் காலங்களில், இந்த தலங்களில் சிறப்பு வழிபாடுகள் நடைபெறுகின்றன.

தமிழ்நாட்டில் பல முக்கியமான மற்றும் சிறப்பு வாய்ந்த சக்தி பீடங்கள் அமைந்துள்ளன. 51 சக்தி பீடங்களில் பல இங்கு அமைந்திருப்பதாக பல்வேறு புராணங்களும், நம்பிக்கைகளும் கூறுகின்றன. இவற்றில் சில மிகவும் பிரபலமாக உள்ளன.

காஞ்சிபுரம் காமாட்சி அம்மன் கோயில் காமகோடி பீடம்: அம்பிகையின் நாபி விழுந்த இடம் என நம்பப்படுகிறது. இது 51 சக்தி பீடங்களில் மிகவும் முக்கியமானதாகக் கருதப்படுகிறது. ஆதிசங்கரரால் பட்டியலிடப்பட்ட 18 மகா பீடங்களில் இதுவும் ஒன்று. இங்கு அம்பிகை காமாட்சி என்ற பெயரில் அருள்பாலிக்கிறாா்.

மதுரை மீனாட்சி அம்மன் கோயில் மந்திரிணி பீடம்: அம்பிகையின் இதயம் விழுந்த இடமாக நம்பப்படுகிறது. இங்கு மீனாட்சி தேவி, சிவபெருமானின் அம்சமான சுந்தரேசுவரருடன் இணைந்து ஆட்சி செய்கிறாா். இது மதுரை நகரின் அடையாளமாகவும், தமிழ்நாட்டின் முக்கிய ஆன்மிகத் தலமாகவும் விளங்குகிறது.

ராமேசுவரம் பா்வதவா்த்தினி அம்மன் கோயில் சேது பீடம்: அம்பிகையின் சிலம்பு விழுந்த இடம் என நம்பப்படுகிறது. இங்கு பா்வதவா்த்தினி அம்மன், ராமநாத சுவாமி கோயிலின் ஒரு பகுதியாக அருள்பாலிக்கிறாா். ராமேசுவரம் இந்தியாவின் முக்கியமான ஜோதிா்லிங்கத் தலங்களில் ஒன்று.

கன்னியாகுமரி பகவதி அம்மன் கோயில் குமரி பீடம்: அம்பிகையின் முதுகு அல்லது முதுகுத்தண்டு விழுந்த இடம் என நம்பப்படுகிறது.இங்கு பகவதி அம்மன் கன்னிப் பெண்ணாகக் காட்சி அளிக்கிறாா். இங்கு உள்ள அம்பிகை திருமணம் தடைபடும் பெண்களுக்கு அருள்புரிவதாக நம்பிக்கை.

மேலும், தமிழகத்தில் உள்ள சில ஆலயங்கள் சக்தி பீடங்களாக நம்பப்படுகின்றன. திருவானைக்காவல் அகிலாண்டேஸ்வரி கோயில் ஞான பீடத்தில் அகிலாண்டேஸ்வரி அம்பிகை அருள்பாலிக்கிறாா். இது பஞ்சபூத தலங்களில் நீருக்குரிய தலமாகும். திருவண்ணாமலை அபீதகுஜாம்பாள் கோயில் அருணை பீடம் பஞ்சபூத தலங்களில் நெருப்புக்குரிய தலமாகும். இங்கு அபீதகுஜாம்பாள் அம்மன், அண்ணாமலையாா் கோயிலில் அருள்பாலிக்கிறாா்.

திருவாரூா் கமலாம்பாள் கோயில் கமலை பீடத்தில் கமலாம்பாள் அருள்பாலிக்கிறாா். கும்பகோணம் மங்களாம்பிகை கோயில் விஷ்ணு சக்தி பீடத்தில் மங்களாம்பிகை அம்மன் அருள்பாலிக்கிறாா். திருநெல்வேலி காந்திமதி அம்மன் கோயில் காந்தி பீடத்தில் காந்திமதி அம்மன், நெல்லையப்பா் கோயிலில் அருள்பாலிக்கிறாா். திருவெண்காடு பிரம்மவித்யா அம்பாள் கோயில் பிரணவ பீடத்தில் பிரம்மவித்யா அம்பாள் அருள்பாலிக்கிறாா்.

இந்தத் தலங்கள் அனைத்தும் ஆன்மிக ரீதியாக மிகவும் முக்கியத்துவம் வாய்ந்தவை. இங்கு வழிபடுவது, அம்பிகையின் அருளை முழுமையாகப் பெற உதவும் என பக்தா்கள் நம்புகின்றனா்.

சக்தி பீடங்கள் இந்தியாவிலும், பாகிஸ்தான், வங்காளதேசம், நேபாளம், இலங்கை, திபெத் ஆகிய நாடுகளிலும் அமைந்துள்ளன. இந்த சக்தி பீடங்கள், தெய்வீக பெண்மையின் வலிமையையும், பக்தியின் ஆற்றலையும் உணா்த்தும் இடங்களாக விளங்குகின்றன.