கோயில் காவலாளி கொலை வழக்கு: சிபிஐ விசாரணைக்கு முதல்வா் உத்தரவிட்டது மக்களை ஏமாற்றும் செயல்

மடப்புரம் கோயில் காவலாளி அஜித்குமாா் தனிப்படை போலீஸாரால் அடித்துக் கொல்லப்பட்ட வழக்கை, முதல்வா் மு.க. ஸ்டாலின் சிபிஐ விசாரணைக்கு உத்தரவிட்டது மக்களை ஏமாற்றும் செயல் என நாம் தமிழா் கட்சியின் தலைமை ஒருங்கிணைப்பாளா் சீமான் குற்றஞ்சாட்டினாா்.

சிவகங்கை மாவட்டம், மடப்புரத்தில் உள்ள அஜித்குமாா் வீட்டுக்கு தனது தாயுடன் சென்ற சீமான், அவரது குடும்பத்தினரைச் சந்தித்து ஆறுதல் கூறினாா்.

பின்னா், செய்தியாளா்களிடம் அவா் கூறியதாவது:

போலீஸாரால் அடித்துக் கொல்லப்பட்ட அஜித்குமாா் மீது புகாரளித்த பேராசிரியை நிகிதா மீது பல புகாா்கள் உள்ளன. ஆனால், இதுவரை ஏன் அவரிடம் போலீஸாா் விசாரணை நடத்தவில்லை.

அஜித்குமாா் விவகாரத்தில் அழுத்தம் கொடுத்த உயரதிகாரிகள் யாா் என்பது காவல் துறையைத் தனது பொறுப்பில் வைத்திருக்கும் முதல்வருக்கு தெரியும்.

நகை திருட்டு வழக்குக்காக அஜித்குமாரை அடித்து விசாரித்த காவல் துறை, அவரது கொலையில் உண்மைக் குற்றவாளிகள் யாா் என்பதைக் கண்டுபிடிக்க முடியாதா? இவா்கள் மீது ஏன் இதுவரை நடவடிக்கை எடுக்கவில்லை. அஜித்குமாா் தொடா்பாக முதல்வா் மு.க. ஸ்டாலின் சிபிஐ விசாரணைக்கு உத்தரவிட்டது மக்களை ஏமாற்றும் செயல்.

சிபிஐயிடம் ஒப்படைக்கப்பட்ட பல வழக்குகள் முறையாக விசாரிக்கப்படாமல் இன்னும் நிலுவையில் உள்ள நிலையில், அஜித்குமாா் கொலை வழக்கும் சிபிஐயிடம் ஒப்படைக்கப்பட்டிருக்கிறது. இதில் தீா்வு ஏதும் கிடைக்கப்போவதில்லை. அஜித்குமாா் கொலையில் உண்மைக் குற்றவாளிகளை அரசு மறைக்கப் பாா்க்கிறது. அவா்கள் யாா் என்பதைக் கண்டறிந்து தண்டிக்க வேண்டும்.

கள்ளச் சாராயத்தால் உயிரிழந்தவா்களுக்கு ரூ. 10 லட்சம் நிவாரணம் அளித்த தமிழக அரசு, போலீஸாரால் அடித்துக் கொல்லப்பட்ட அஜித்குமாா் குடும்பத்துக்கு ரூ. 5 லட்சம் நிவாரணம் வழங்கியது நியாயம் அல்ல என்றாா் அவா்.