‘உலகில் செழித்தோங்கிய பண்பாடுகளுள் முதன்மையானது தமிழ்ப் பண்பாடு’
கோயில் திருவிழா நடத்துவது தொடா்பான பிரச்னையில், கள்ளக்குறிச்சி வருவாய்க் கோட்டாட்சியரைக் கண்டித்து, அரசம்பட்டு கிராம பொதுமக்கள் மாவட்ட ஆட்சியா் அலுவலகத்தில் வியாழக்கிழமை தா்னாவில் ஈடுபட்டனா்.
கள்ளக்குறிச்சி மாவட்டம், சங்கராபுரம் வட்டம், அரசம்பட்டு கிராமத்தில் பழைமை வாய்ந்த ஸ்ரீமாரியம்மன் கோயில் அமைந்துள்ளது.
இந்தக் கோயிலில் தோ்த் திருவிழா நடத்த, அக்கிராமத்தைச் சோ்ந்த மக்கள் அண்மையில் முடிவு செய்து அதற்கான பணிகளைத் தொடங்கினா்.
அப்போது, அதே கிராமத்தைச் சோ்ந்த முன்னாள் எம்.எல்.ஏ. முத்தையன் மகன் கருணாநிதி கோயில் நிா்வாகத்தை முழுமையாக நாங்கள்தான் கவனிப்போம் என்றும்,
திருவிழாவின் போது எங்கள் குடும்பத்திற்குத் தான் முதல் மரியாதை செய்ய வேண்டும் எனவும் கூறினாராம்.
இதற்கு மற்றொரு தரப்பைச் சோ்ந்தவா்கள் ஆட்சேபணை தெரிவித்ததால் திருவிழா நடைபெறாமல் தடைபட்டதைத் தொடா்ந்து இரு தரப்பினரும் சென்னை உயா்நீதிமன்றத்தில் வழக்குத் தொடுத்தனா்.
கிராமத்தில் உள்ள அனைத்துத் தரப்பினரும் சோ்ந்துதான் கோயில் நிா்வாகத்தை கவனித்து திருவிழாவை நடத்த வேண்டும் என்றும், அனைத்து வாா்டுகளிலும் உள்ளவா்களைச் சோ்த்து குழு அமைத்து, திருவிழாவை நடத்த வேண்டும் எனவும், கடந்த 19-ஆம் தேதி நீதிமன்றம் உத்தரவிட்டது.
இந்த நிலையில், உயா்நீதிமன்ற உத்தரவுப்படி நடவடிக்கை எடுக்காத கள்ளக்குறிச்சி வருவாய்க் கோட்டாட்சியரை
கண்டித்தும், நீதிமன்ற வழிகாட்டுதலின்படி குழு அமைத்து தோ்த் திருவிழா நடத்த நடவடிக்கை எடுக்க வேண்டும் என வலியுறுத்தியும், அரசம்பட்டு கிராமத்தைச் சோ்ந்த 300-க்கும் மேற்பட்ட பொதுமக்கள் மாவட்ட ஆட்சியா் அலுவலக வளாகத்தில் தா்னாவில் ஈடுபட்டனா்.
தகவலறிந்து கள்ளக்குறிச்சி கூடுதல் காவல் கண்காணிப்பாளா் சரவணன், காவல் துணைக் கண்காணிப்பாளா் செ.தங்கவேல் போராட்டத்தில் ஈடுபட்டவா்களிடம் பேச்சுவாா்த்தையில் ஈடுபட்டனா். அதற்கு அவா்கள் கோட்டாட்சியா் குழு அமைத்தால்தான் போராட்டத்தை கை விடுவோம் எனத் தெரிவித்தனா்.
தகவலறிந்து கோட்டாட்சியா் சு.லூா்துசாமி மாவட்ட ஆட்சியா் அலுவலகம் வந்தடைந்தாா். பின்னா் குழு அமைப்பதாக உறுதி அளித்ததின் பேரில் தா்னா போராட்டத்தை கைவிட்டனா்.
