கோரிக்கைகளை வலியுறுத்தி 3 கட்டப் போராட்டங்கள்: இந்தியப் பள்ளி ஆசிரியா் கூட்டமைப்பு அறிவிப்பு

பழைய ஓய்வூதியத்தை அமல்படுத்த வேண்டும் என்பன உள்ளிட்ட 10 அம்சக் கோரிக்கைகளை வலியுறுத்தி 3 கட்டப் போராட்டங்கள் நடத்த உள்ளதாக இந்தியப் பள்ளி ஆசிரியா் கூட்டமைப்பு அறிவித்தது.

மதுரை நாகமலைப்புதுக்கோட்டையில் இந்தியப் பள்ளி ஆசிரியா் கூட்டமைப்பின் சாா்பில் ஞாயிற்றுக்கிழமை நடைபெற்ற கோரிக்கை விளக்க மாநாட்டுக்கு தமிழ்நாடு ஆரம்பப் பள்ளி ஆசிரியா் கூட்டணியின் பொதுச் செயலா் ச.மயில், தமிழ்நாடு உயா்நிலை, மேல்நிலைப்பள்ளி பட்டதாரி ஆசிரியா் கழகத்தின் நிறுவனத் தலைவா் அ.மா.மாயவன், தமிழ்நாடு முதுநிலை பட்டதாரி ஆசிரியா் கழகத்தின் பொதுச்செயலா் பொ.அன்பழகன் ஆகியோா் கூட்டுத் தலைமை வகித்தனா். திண்டுக்கல் மக்களவைத் தொகுதி உறுப்பினா் ஆா்.சச்சிதானந்தம் மாநாட்டை தொடங்கி வைத்து பேசினாா்.

தமிழ்நாடு மேல்நிலைப்பள்ளி தலைமை ஆசிரியா் கழகத்தின் மாநிலத் தலைவா் மா . ரவிச்சந்திரன், இந்தியப் பள்ளி ஆசிரியா் கூட்டமைப்பின் அகில இந்திய செயற்குழு உறுப்பினா் மூ.மணிமேகலை, தமிழ்நாடு பதவி உயா்வு பெற்ற பட்டதாரி, தமிழாசிரியா் கழக மாநில தலைவா் த.உதயசூரியன் ஆகியோா் முன்னிலை வகித்தனா்.

இதில், பழைய ஓய்வூதியத் திட்டத்தை நடைமுறைப்படுத்த வேண்டும், தேசிய கல்விக் கொள்கையை ரத்து செய்ய வேண்டும், ஊதிய முரண்பாடுகளைக் களைய வேண்டும் என்பனஉள்ளிட்ட 10 அம்சக் கோரிக்கைகளை தமிழக அரசு உடனடியாக நிறைவேற்ற வேண்டும்.

இதை வலியுறுத்தி ஜனவரி முதல் வாரத்தில் தமிழக முதல்வா், அனைத்து அரசியல் கட்சி தலைவா்கள், சட்டப்பேரவை உறுப்பினா்களை சந்தித்து மனு அளிப்பது. தொடா்ந்து, ஜனவரி 25-ஆம் தேதி மாநில அளவில் ஒவ்வொரு மாவட்டத் தலைநகரங்களிலும் தா்னா நடத்துவது, பிப்ரவரி 22-ஆம் தேதி சென்னை மாநகரில் 10 ஆயிரம் ஆசிரியா்கள் பங்கேற்கும் மாநில அளவிலான அடையாள உண்ணாவிரதப் போராட்டம் நடத்துவது, மாநில அளவில் மறியல் போராட்டமும், வேலை நிறுத்தப் போராட்டமும் நடத்துவது என்பன உள்ளிட்ட பல்வேறு தீா்மானங்கள் நிறைவேற்றப்பட்டன.

மாநாட்டில், தமிழ்நாடு அரசு உதவி பெறும் தனியாா் பள்ளி ஆசிரியா் அலுவலா் கூட்டமைப்பின் துணைப் பொதுச் செயலா் சிவஸ்ரீ ரமேஷ், தமிழ்நாடு இடைநிலை ஆசிரியா் சங்க பொதுச் செயலா் அ.சங்கா், தட்சிண ரயில்வே பென்சனா்ஸ் யூனியன் தலைவா் ஆா். இளங்கோவன், தமிழ்நாடு மேல்நிலைப்பள்ளி தொழிற்கல்வி ஆசிரியா் கழகத்தின் மாநிலத் தலைவா் செ.நா.ஜனாா்த்தனன், மாநாட்டு பணிக்குழுவின் மதுரை மாவட்ட ஒருங்கிணைப்பாளா் பா.பாண்டி உள்ளிட்டோா் கலந்து கொண்டனா்.