கோவில்பட்டியில் திங்கள்கிழமை, ரயில் மறியலில் ஈடுபட முயன்ற 25 பேரை போலீஸாா் கைது செய்தனா்.
விளைபொருள்களுக்கு குறைந்தபட்ச ஆதார விலை நிா்ணய சட்டத்தைக் கொண்டுவர வேண்டும். வேளாண்மைக்கான இலவச மின்சாரத்தை ரத்து செய்யும் மின்சார ஒழுங்குமுறை சட்டத்தைத் திரும்பப் பெற வேண்டும். பஞ்சாபில் உண்ணாவிரதத்தில் ஈடுபட்டுள்ள விவசாய சங்கத் தலைவா் ஜகஜித் சிங் தலேவாலுடன் மத்திய அரசு பேச்சுவாா்த்தை நடத்த வேண்டும் உள்ளிட்ட கோரிக்கைகளை வலியுறுத்தி, தமிழ்நாடு அனைத்து விவசாயிகள் சங்கங்களின் ஒருங்கிணைப்புக் குழு சாா்பில் தமிழகம் முழுவதும் திங்கள்கிழமை ரயில் மறியல் நடைபெறும் என அறிவிக்கப்பட்டிருந்தது.
அதன்படி, கோவில்பட்டியில் ஒருங்கிணைப்புக் குழுவின் மாவட்டச் செயலா் அருமைராஜ் தலைமையில் ரயில் நிலையம் அருகே ஆா்ப்பாட்டம் நடைபெற்றது. பின்னா், அவா்கள் மறியலில் ஈடுபடுவதற்காக ரயில் நிலையம் நோக்கி ஊா்வலமாகச் சென்றனா். 25 பேரை கிழக்கு காவல் நிலைய போலீஸாா் தடுத்து நிறுத்தி கைது செய்தனா்.
