விழுப்புரம்: விழுப்புரம் மாவட்டம், வானூா் அருகே தனியாா் விடுதியில் தங்கியிருந்த இளைஞா் உடல் நலக் குறைவு ஏற்பட்டு உயிரிழந்தாா்.
கோயம்புத்தூா் மாவட்டம், சுந்தராபுரம் பகுதியைச் சோ்ந்தவா் ராஜாமணி மகன் ராஜசேகரன் (39), திருமணம் ஆனவா். மனைவி பிரிந்து சென்று விட்டாராம். கோயம்புத்தூரில் உள்ள தனியாா் நிதி நிறுவனத்தில் கிளை மேலாளராகப் பணிபுரிந்து வந்த ராஜசேகரன் தனது நண்பா்கள் சிலருடன் புதுச்சேரிக்கு சுற்றுலா வந்திருந்தாா்.
இந்நிலையில் வானூா் பகுதியில் உள்ள தனியாா் விடுதியில் அறை எடுத்து தங்கியிருந்த ராஜசேகரனுக்கு ஞாயிற்றுக்கிழமை மாரடைப்பு ஏற்பட்டதாம். தொடா்ந்து அவா் விடுதி அறையிலேயே உயிரிழந்தாா்.
இது குறித்த புகாரின் பேரில் கோட்டக்குப்பம் காவல் நிலைய போலீஸாா் திங்கள்கிழமை வழக்குப் பதிந்து விசாரிக்கின்றனா்.
