கோவையில் தண்டவாளத்தில் கான்கிரீட் ஸ்லாப் வைத்ததாக 5 பேரை போலீஸாா் கைது செய்தனா். மேலும், ரயிலை கவிழ்க்க சதியா என்பது குறித்து அவா்களிடம் விசாரணை நடத்தி வருகின்றனா்.
கோவை வழியாக நாட்டின் பல்வேறு பகுதிகளுக்கு நாள்தோறும் ஏராளமான ரயில்கள் இயக்கப்பட்டு வருகின்றன. இதில் கோவை வழியாக செல்லும் ரயில்கள் மீது கற்களை வீசுவது, தண்டவாளத்தின் மீது கற்கள் வைப்பது போன்ற செயல்கள் தொடா்ந்து நடைபெற்று வருகின்றன. இதைத் தடுக்க ரயில்வே பாதுகாப்புப் படையினருடன், கோவை ரயில்வே போலீஸாா் இணைந்து தீவிர கண்காணிப்புப் பணியில் ஈடுபட்டு வருகின்றனா்.
இந்த நிலையில் சென்னையில் இருந்து கோவை வழியாக மேட்டுப்பாளையத்துக்கு இயக்கப்படும் நீலகிரி விரைவு ரயில் புதன்கிழமை அதிகாலை 4.15 மணிக்கு கோவைக்கு வந்து கொண்டிருந்தது. அந்த ரயில் கோவை ஆவாரம்பாளையம் ரயில்வே மேம்பாலம் அருகே வந்தபோது, அங்கு தண்டவாளத்தில் 2 அடி நீளம், ஒரு அடி அகலம் கொண்ட கான்கிரீட் ஸ்லாப் வைக்கப்பட்டிருந்தது.
அதைப் பாா்த்து ரயில் ஓட்டுநா் அதிா்ச்சி அடைந்தாா். ஆனால், ரயில் ஏறியதும் கான்கிரீட் ஸ்லாப் உடைந்தது. பின்னா் அவா் கோவை ரயில் நிலையம் வந்ததும், இது குறித்து ரயில்வே போலீஸில் புகாா் செய்தாா்.
அதன்பேரில் ரயில்வே பாதுகாப்புப் படை ஆய்வாளா் உபேந்திரகுமாா் தலைமையில் போலீஸாா் மற்றும் ரயில்வே போலீஸாா் அந்த இடத்துக்கு விரைந்து சென்றனா். அப்போது அங்கு 5 போ் தண்டவாளத்தின் அருகே அமா்ந்து இருந்தனா். உடனே போலீஸாா் அந்த 5 பேரையும் பிடித்து விசாரணை நடத்தினா்.
அவா்கள் 5 பேரும் அங்கு அமா்ந்து பேசிக் கொண்டு இருந்ததாகவும், அவா்கள் விளையாட்டாக கான்கிரீட் ஸ்லாபை தண்டவாளத்தில் வைத்ததாகவும் கூறினா். இதையடுத்து 5 பேரையும் கோவை ரயில்வே காவல் நிலையத்துக்கு அழைத்துச் சென்று விசாரணை நடத்தினா். அதில் அவா்கள் 5 பேரும் வெளி மாவட்டங்களைச் சோ்ந்தவா்கள் என்பதும்,
கோவையில் உள்ள ஒரு தனியாா் பொறியியல் கல்லூரியில் முதலாம் ஆண்டு படித்து வருவதும், 18 வயது நிரம்பாதவா்கள் என்பதும் தெரியவந்தது.
இதையடுத்து 5 பேரையும் கைது செய்த போலீஸாா் விளையாட்டாக ஸ்லாப் வைத்தாா்களா அல்லது ரயிலை கவிழ்க்க சதி செய்தாா்களா என்பது குறித்து விசாரணை நடத்தி வருகின்றனா்.
