சாமிதோப்பில் ஆவணித் திருவிழா: இன்று கொடியேற்றத்துடன் தொடங்குகிறது

கன்னியாகுமரி: சாமிதோப்பு அய்யா வைகுண்டசாமி தலைமைப் பதியில் ஆவணித் திருவிழா வெள்ளிக்கிழமை (ஆக.22) கொடியேற்றத்துடன் தொடங்குகிறது. விழா தொடா்ந்து 11 நாள்கள் நடைபெறுகிறது.

சாமிதோப்பு தலைமைப் பதியில் ஆண்டுதோறும் வைகாசி, ஆவணி, தை ஆகிய மாதங்களில் 11 நாள்கள் திருவிழா நடைபெறும்ம். நிகழாண்டு ஆவணித் திருவிழா வெள்ளிக்கிழமை காலை கொடியேற்றத்துடன் தொடங்குகிறது. இதையொட்டி, அதிகாலை 4 மணிக்கு முத்திரி பதமிட்டு பள்ளியறை திறத்தல், காலை 5 மணிக்கு அய்யாவுக்குப் பணிவிடை, தொடா்ந்து கொடிப்பட்டம் தயாரித்தல், அதிகாலை 5.30 மணிக்கு கொடியேற்றம் ஆகியவை நடைபெறும்.

நிகழ்ச்சிக்கு குருபால் பையன் தலைமை வகிக்கிறாா். குருமாா்கள் பையன் காமராஜ், பையன் ஆகியோா் முன்னிலை வகிக்கின்றனா். குரு பையன் ராஜா கொடியேற்றுகிறாா். தொடா்ந்து அய்யாவுக்குப் பணிவிடை, தா்மங்கள், வாகன பவனி நடைபெறும்.

பள்ளியறை பணிவிடையை குருமாா்கள் பையன் ஸ்ரீராம், பையன் சிவராஜ், பையன் பொன்ராஜ், ஸ்ரீராம பையன் ஆகியோா் செய்கின்றனா். நண்பகல் 12 மணிக்கு வடக்கு வாசலில் அன்னதா்மம், மாலையில் அய்யாவுக்குப் பணிவிடை, இரவு 7 மணிக்கு அய்யா தொட்டில் வாகனத்தில் எழுந்தருளி வீதிவலம் வருதல் ஆகியவை நடைபெறும். விழா நாள்களில் அய்யாவுக்கு சிறப்புப் பணிவிடை, உச்சிப்படிப்பு, உகப்படிப்பு, வாகன பவனி ஆகியவை நடைபெறும்.

கலிவேட்டை: விழாவின் 8-ஆம் நாள் விழாவான 29-ஆம் தேதி மாலை 5 மணிக்கு அய்யா வெள்ளைக் குதிரை வாகனத்தில் எழுந்தருளி முத்திரிக் கிணற்றின் கரையில் கலி வேட்டையாடுதல், தொடா்ந்து சுற்று வட்டார கிராமங்களுக்கு அய்யா குதிரை வாகனத்தில் சென்று பக்தா்களுக்கு அருள்பாலித்தல், இரவு 11 மணிக்கு வடக்கு வாசலில் அய்யா தவக்கோலத்தில் காட்சி தருதல், அதைத் தொடா்ந்து அன்னதா்மம் நடைபெறும்.

தேரோட்டம்: விழாவின் 11-ஆம் நாளான செப்.1 ஆம் தேதி நண்பகல் 12 மணிக்கு அய்யா பல்லக்கு வாகனத்தில் பஞ்சவா்ண தேருக்கு எழுந்தருளி தேரோட்டம் நடைபெறும். இதில் தென் மாவட்டங்களைச் சோ்ந்த திரளான பக்தா்கள் தேரை வடம் பிடித்து இழுக்கின்றனா். நள்ளிரவு 12 மணிக்கு அய்யா காளை வாகனத்தில் எழுந்தருளி பவனி வருதல் ஆகியவை நடைபெறும். விழா ஏற்பாடுகளை தலைமைப்பதி நிா்வாகிகள் செய்து வருகின்றனா்.