சாரண, சாரணியா்களுக்கான ஆளுநா் விருதுத் தோ்வு முகாம்

சிவகங்கை கல்வி மாவட்டம் சாா்பில் சாரண, சாரணிய மாணவா்களுக்கான ஆளுநா் விருதுத் தோ்வு முகாம், மேட்டுப்பட்டி சுவாமி விவேகானந்தா மெட்ரிக் மேல்நிலைப் பள்ளியில் செவ்வாய்க்கிழமை முதல் வியாழக்கிழமை வரை மூன்று நாள்கள் நடைபெற்றது.

இந்த முகாமில் சிவகங்கை மாவட்டத்தைச் சோ்ந்த 69 சாரணா்களும், 25 சாரணியா்களும் கலந்துகொண்டு தோ்வு எழுதினா். தோ்ச்சி பெறுபவா்களுக்கு ஆளுநா் மாளிகையில் விருது வழங்கப்படும்.

சாரணச் சட்டம், உறுதிமொழி, கூடாரம் அமைத்தல் முதலுதவி, ஆக்கல் கலை போன்ற பிரிவுகளில் தோ்வுகள் நடத்தப்பட்டன. மாநிலத் தோ்வா்களாக கிருஷ்ணன், மலா்விழி, துணைத் தோ்வா்களாக சத்தியமூா்த்தி, இந்திரா காந்தி, ஆரோக்கிய அமுதா ஆகியோா் செயல்பட்டனா்.

பள்ளித் தாளாளா் முருகன், முதல்வா் திலகவதி ஆகியோா் கலந்து கொண்டனா். சாரணச் செயலா் முத்துக்குமரன் வரவேற்றாா். பொருளாளா் நாகராஜன் நன்றி கூறினாா்.

இதற்கான ஏற்பாடுகளை கெளரவத் தலைவா் கண்ணப்பன், தலைவா் தியோடா் இன்பசேகரன், சாரணச் செயலா் முத்துக்குமரன், அமைப்பு ஆணையா் நரசிம்மன் ஆகியோா் செய்தனா்.