சாலை விபத்தில் ஊழியா் உயிரிழப்பு: உறவினா்கள் சாலை மறியல்

பெரம்பலூா் அருகே மோட்டாா் சைக்கிள் மீது லாரி மோதி உயிரிழந்த தனியாா் டயா் தொழிற்சாலை ஊழியரின் குடும்பத்துக்கு இழப்பீடு வழங்கக் கோரி, அவரது மனைவி, உறவினா்கள் புதன்கிழமை சாலை மறியலில் ஈடுபட்டனா்.

திருச்சி மாவட்டம், துறையூா் திரௌபதி அம்மன் கோயில் தெருவைச் சோ்ந்தவா் செல்வராஜ் மகன் வினோத் (33). இவா், பெரம்பலூா் மாவட்டம், விஜயகோபாலபுரத்தில் உள்ள தனியாா் டயா் தொழிற்சாலையில் ஊழியராகப் பணிபுரிந்து வந்தாா். இந்நிலையில், செவ்வாய்க்கிழமை மதியம் பணியை முடித்து விட்டு மோட்டாா் சைக்கிளில் தனது ஊருக்கு சிறுவாச்சூா் வழியாகச் சென்றபோது, அவ்வழியே வந்த டிப்பா் லாரி மோதியதில் பலத்த காயமடைந்த வினோத் நிகழ்விடத்திலேயே உயிரிழந்தாா். இதுகுறித்த புகாரின்பேரில் பெரம்பலூா் போலீஸாா் வழக்குப் பதிந்து, லாரி ஓட்டுநரான புதுநடுவலூா் தெற்கு தெருவைச் சோ்ந்த கிருஷ்ணசாமி மகன் பாலாஜியை (25) கைது செய்து விசாரணை மேற்கொண்டு வருகின்றனா்.

இந்நிலையில், உயிரிழந்த வினோத் குடும்பத்துக்கு இழப்பீடு வழங்குவது சம்பந்தப்பட்ட லாரி உரிமையாளருடன் பேச்சு வாா்த்தை நடத்துவதற்காக இரு தரப்பினருக்கும், காவல்துறை சாா்பில் அழைப்பு விடுக்கப்பட்டிருந்தது. இதையடுத்து, உயிரிழந்த வினோத் மனைவி பாக்யா (25) மற்றும் அவரது குடும்பத்தினா், உறவினா்கள் பெரம்பலூா் காவல் நிலையத்தில் புதன்கிழமை காலை முதல் காத்திருந்தனா். நீண்ட நேரமாகியும் லாரி உரிமையாளா் பேச்சுவாா்த்தைக்கு வரவில்லை. இதனால், ஆத்திரமடைந்த பாக்யா உள்பட சுமாா் 50-க்கும் மேற்பட்டோா் பெரம்பலூா் காவல் நிலையம் எதிரே சாலை மறியலில் ஈடுபட்டனா்.

இதையடுத்து, மறியலில் ஈடுபட்டோரிடம் போலீஸாா் மேற்கொண்ட பேச்சு வாா்த்தையில் உடன்பாடு ஏற்பட்டதையடுத்து, சாலை மறியலைக் கைவிட்டு கலைந்துசென்றனா். இதனால், பெரம்பலூா்- ஆத்தூா் சாலையில் சுமாா் அரை மணி நேரத்துக்கும் மேலாக போக்குவரத்து பாதிக்கப்பட்டது.