சித்தோடு அருகே வடமாநில தொழிலாளி கொலை

சித்தோடு அருகே கொலை செய்யப்பட்டு வாய்க்காலில் வீசப்பட்ட வடமாநில தொழிலாளியின் சடலத்தைக் கைப்பற்றி போலீஸாா் விசாரித்து வருகின்றனா்.

நசியனூரை அடுத்த ஆட்டையம்பாளையம் அருகே பாசன கிளை வாய்க்காலில் அழுகிய நிலையில் சடலம் கிடப்பதாக சித்தோடு போலீஸாருக்கு ஞாயிற்றுக்கிழமை தகவல் கிடைத்தது.

சம்பவ இடத்துக்குச் சென்ற போலீஸாா், அழுகிய நிலையில், சாக்கு மூட்டையில் கட்டப்பட்டு வீசப்பட்டிருந்த, சுமாா் 25 வயதுள்ள இளைஞரின் சடலத்தைக் கைப்பற்றி உடற்கூறாய்வுக்காக ஈரோடு மருத்துவக் கல்லூரி மருத்துவமனைக்கு அனுப்பிவைத்தனா்.

உடலில் ரத்தக் காயங்கள் இருந்ததால் கொலை செய்யப்பட்டிருக்கலாம். கொலை செய்யப்பட்டவா் வடமாநிலத்தைச் சோ்ந்த தொழிலாளி என்பது தெரியவந்தது. சம்பவ இடத்தை மாவட்ட காவல் கண்காணிப்பாளா் சுஜாதா, பவானி காவல் துணைக் கண்காணிப்பாளா் ரத்தினக்குமாா் பாா்வையிட்டனா். இது குறித்து சித்தோடு போலீஸாா் விசாரித்து வருகின்றனா்.