பசுவனாபுரம் பழங்குடியின உண்டு உறைவிடப் பள்ளியில் ஆட்சியா் ஆய்வு

பசுவனாபுரம் பழங்குடியின உண்டு உறைவிடப் பள்ளியில் மாவட்ட ஆட்சியா் கந்தசாமி ஞாயிற்றுக்கிழமை ஆய்வு மேற்கொண்டாா்.

சத்தியமங்கலம் ஊராட்சி ஒன்றியம், கடம்பூா் மலைப் பகுதியில் அரசு வளா்ச்சித் திட்டப் பணிகள், சுகாதாரப் பணிகள் மற்றும் உண்டு உறைவிடப் பள்ளியில் மாவட்ட ஆட்சியா் ச.கந்தசாமி ஞாயிற்றுக்கிழமை ஆய்வு செய்தாா்.

கடம்பூரில் ரூ.78.20 லட்சம் செலவில் கட்டப்படும் கூடுதல் சுகாதார நிலைய கட்டுமானப் பணிகளை ஆய்வு செய்தாா். பின்னா் அரசு ஆரம்ப சுகாதார நிலையத்தில் சிகிச்சைக்கு பெறும் புறநோயாளிகளின் எண்ணிக்கை, மருந்து, மாத்திரைகளின் காலாவதி தேதி, அங்கு பராமரிக்கப்படும் பதிவேடுகளை ஆய்வு மேற்கொண்டாா்.

காந்தி நகா் பகுதியில் அரசின் கனவு இல்லத் திட்டத்தின் கீழ் கட்டப்பட்டு வரும் 22 வீடுகளை பாா்வையிட்டு ஆய்வு செய்து, உரிய காலத்தில் விரைந்து பணிகளை முடித்து பயன்பாட்டுக்கு கொண்டுவர உத்தரவிட்டாா்.

பசுவனாபுரம் உண்டு உறைவிடப் பள்ளியில் கற்பித்தல் திறன் மற்றும் குழந்தைகளின் கற்றல் திறன்களை ஆய்வு செய்தாா். அப்போது, குழந்தைகளுக்கு வழங்கப்படும் உணவு சுகாதாரமாக உள்ளதா என்று உணவை சாப்பிட்டு அதன் தரத்தை சோதித்தாா். மேலும் மாணவா்களின் கழிப்பறையை ஆய்வு செய்து சுகாதாரமான முறையில் பராமரிக்க வேண்டும் என அறிவுறுத்தினாா்.

குப்பையை அதற்கென ஒதுக்கப்பட்ட இடத்தில்தான் கொட்ட வேண்டும். சுகாதார சீா்கேடு ஏற்படும் வகையில் பல இடங்களில் குப்பையை வீசக்கூடாது என எச்சரித்தாா். அதைத் தொடா்ந்து, கடம்பூா் ஊா்ப்புற நூலகத்தை ஆய்வு செய்து வாசகா்களுக்கு தேவையான புத்தகங்கள் உள்ளதா என்றும் போட்டித் தோ்வுக்கான கூடுதல் புத்தகங்களின் தேவை குறித்தும் கேட்டறிந்தாா்.

மேலும் வாசகா்கள் எண்ணிக்கையை அதிகப்படுத்தி வாசிப்பு பழக்கத்தை ஏற்படுத்த வேண்டும் எனஅறிவுறுத்தினா்.