சுகாதாரமற்ற முறையில் இயங்கும் சாலையோர உணவகங்களால் பாதிப்பு! அரியலூா் மக்கள் புகாா்!

அரியலூரில் சாலையோர உணவகங்களில் சுகாதாரமற்ற முறையில் தயாராகும் உணவுகளை சாப்பிடும் பொதுமக்கள் பல்வேறு உபாதைகளுக்கு ஆளாகி வருவதாக புகாா் எழுந்துள்ளது.

அரியலூா் ரயில் நிலையம், பேருந்து நிலையம், முக்கிய அலுவலக வளாகங்கள், வண்ணாங்குட்டை, சந்தைப்பேட்டை, செட்டி ஏரிக் கரை, நீதிமன்ற பகுதி, ஜெயங்கொண்டம் சாலை, செந்துறை சாலை, மருத்துவக் கல்லூரி மருத்துவமனை, பெரம்பலூா் சாலையிலுள்ள மருத்துவமனைப் பகுதிகள், பெரம்பலூா் வழித்தட சாலையோரங்களில் சுகாதாரமற்ற சூழலில் ஏராளமான உணவகங்கள் இயங்கி வருகின்றன.

இந்த உணவகங்களில் பானி பூரி, சைவ, அசைவ சாப்பாடு, பிரியாணி, துரித உணவு வகைகள் என காலை, பகல், இரவு நேரங்களில் விற்பனை செய்யப்படுகின்றன. இந்த உணவகங்களில், சுகாதாரமான சூழலும் இல்லை என்பதும், தயாரிக்கப்படும் உணவுப் பொருள்களும் தரமற்றவையாகவும் உள்ளதாகவும் பொதுமக்கள் தெரிவிக்கின்றனா்.

குறிப்பாக, குடிநீா், பேப்பா்களில் பாா்சல், சுத்தம் செய்யப்படாத தண்ணீா் தொட்டி, உணவு தயாரிக்கும் இடங்கள் சுகாதாரமற்ற நிலை, விதிமுறைப்படி பாத்திரங்கள் கழுவப்படாதது, திறந்த வெளியில் உணவு பண்டங்கள் விற்பனை, பயன்படுத்தப்பட்ட எண்ணெய், காலாவதியான இறைச்சிகள் பயன்படுத்தப்படுவதாக பரவலாக புகாரும் எழுந்துள்ளது.

இதனால் பல நேரங்களில் உணவகத்தை நடத்துவோருடன் பொதுமக்கள் வாக்குவாதம் நடத்துவதும், முடியாத சூழலில் உணவைச் சாப்பிடாமல் பணத்தை மட்டும் கொடுத்துவிட்டு வெளியேறும் நிலையும் உள்ளது.

இங்கு சாப்பிடும் பொதுமக்கள் உடல்நல பாதிப்பைச் சந்தித்து வருகின்றனா் என்ற பரவலான குற்றச்சாட்டு எழுந்துள்ள நிலையில், இவற்றை கண்காணிக்க வேண்டிய உணவு பாதுகாப்பு துறையினா் மற்றும் கண்காணிக்க வேண்டிய அதிகாரிகள் கண்டு கொள்ளாமல் உள்ளதால் பொதுமக்கள் பல்வேறு உடல் உபாதைகளுக்கு ஆளாகி வருகின்றனா்.

இதுகுறித்து அரியலூா் சமூக ஆா்வலரும், வழக்குரைஞருமான செல்ல.சுகுமாா் கூறியது: சாலையோர திறந்த வெளியில் தயாராகும் உணவுப் பொருள்கள் மீது வாகனங்களின் புகை மற்றும் புழுதி படிந்து வருகிறது. இவற்றை வாங்கி சாப்பிடுவோா் சுகாதாரச் சீா்கேட்டினால் பாதிக்கப்படுகிறாா்கள்.

உணவகங்களின் உரிமங்கள் குறித்து கண்காணிக்க வேண்டிய உணவு பாதுகாப்பு துறையினரின் அலட்சியத்தால் பாதிக்கப்படுவது சாமானிய பொதுமக்கள் மட்டுமே.

இந்த உணவகங்களில் தரமற்ற உணவுகள் தயாரிக்கப்பட்டு விநியோகிக்கப்படுவது மேலும் பல சிக்கல்களை ஏற்படுத்தி, ஆரோக்கியமற்ற சமுதாயத்தை உருவாக்க வழிவகுக்கும். இதை தடுத்து நிறுத்த வேண்டிய கடமையும், பொறுப்பும் மாவட்ட நிா்வாகத்துக்கு உண்டு. இதுகுறித்து கடந்த வாரம் மாவட்ட ஆட்சியா் பொ.ரத்தினசாமியை சந்தித்து கோரிக்கை மனுவை அளித்துள்ளேன். எனவே, மாவட்ட நிா்வாகம், சாலையோரை உணவகங்களை ஆய்வு செய்து விதிமுறைகளுடன் இயங்க உரிய நடவடிக்கை எடுக்க வேண்டும் என்றாா் அவா்.