சுழற்சி முறையில் மருத்துவத் துறை தலைவா்கள்: என்எம்சி திட்டம்

மருத்துவக் கல்லூரிகளில் உயா் சிறப்பு மருத்துவத் துறை தலைவா் பொறுப்புகளில் சுழற்சி முறையில் பேராசிரியா்களை நியமிப்பதற்கான வரைவு விதிகளை தேசிய மருத்துவ ஆணையம் (என்எம்சி) வெளியிட்டுள்ளது.

அதன்படி, மருத்துவக் கல்லூரிகளில் 3 ஆண்டுகளுக்கு ஒருமுறை அந்தப் பொறுப்புகளில் நியமிக்கப்பட வேண்டியவா்களுக்கான தகுதிகள் அரசிதழில் வெளியிடப்பட்டுள்ளது. அதுகுறித்த ஆட்சேபனைகள், கருத்துகள், ஆலோசனைகளை 30 நாள்களுக்குள் அனுப்புமாறு என்எம்சி கேட்டுள்ளது.

முதுநிலை மருத்துவக் கல்வி வாரிய விதிகள் 2023-இன் கீழ் சில திருத்தங்கள் மேற்கொள்ளப்பட்டுள்ளன. அதன்படி, உயா் சிறப்பு படிப்புகளான எம்சி ஹெச் (நரம்பியல் அறுவை சிகிச்சை, ஒட்டுறுப்பு மற்றும் சீரமைப்பு சிகிச்சை, ரத்த நாள அறுவை சிகிச்சை) உள்ளிட்ட துறைகளின் தலைவா்களாக முதுநிலை மருத்துவப் படிப்பில் எம்டி, டின்பி (விபத்து காய அறுவை சிகிச்சை, பொது அறுவை சிகிச்சை, தலை-கழுத்து அறுவை சிகிச்சை) நிறைவு செய்த தகுதியான பேராசிரியா்கள் அல்லது பேராசிரியராக உயா்வு பெறும் நிலையில் உள்ள இணை பேராசிரியா்களை நியமிக்கலாம்.

3 ஆண்டுகளுக்கு ஒருமுறை அவா்களை சுழற்சி முறையில் மாற்றியமைக்க வரைவு விதிகளில் வகை செய்யப்பட்டுள்ளது. மருத்துவத் துறையினா், மருத்துவக் கல்வி சாா்ந்தவா்களிடம் இருந்து இதுதொடா்பான கருத்துகளைக் கேட்டறிந்த பிறகு இந்த விதிகள் இறுதி செய்யப்பட உள்ளன.