சென்னை: இரண்டு ரௌடிகள் கொலை - யார் இந்த `சுக்கு காபி' சுரேஷ்?

சென்னை கோட்டூர்புரம் சித்ரா நகரைச் சேர்ந்தவர் அருண்குமார் (25). இவரின் நண்பர் சுரேஷ் (எ) படப்பை சுரேஷ். இவர்கள் இருவரும் ரௌடிகள். நேற்று இரவு (16.3.2025) மது அருந்திய இருவரும் கோட்டூர்புரம் நாகவல்லி அம்மன் கோயில் முன்பு போதையில் படுத்து தூங்கிக் கொண்டிருந்தனர். அப்போது பைக்கில் வந்த எட்டு பேர் கொண்ட கும்பல் ஒன்று அருண், சுரேஷ் ஆகியோரை அரிவாள், கத்தியால் சரமாரியாக வெட்டியது. மதுபோதையில் இருவரும் இருந்ததால் அவர்களால் தப்பி ஓட முடியவில்லை. அதனால் சர்வசாதாரணமாக இருவரையும் வெட்டிவிட்டு அந்தக் கும்பல் தப்பிச் சென்றது.

இதில் படப்பை சுரேஷ் சம்பவ இடத்திலேயே உயிரிழந்தார். ஆபத்தான நிலையில் அருண், ராயப்பேட்டை மருத்துவமனை அரசு மருத்துவமனையில் அனுமதிக்கப்பட்டார். அங்கு சிகிச்சை பலனின்றி அவரும் உயிரிழந்தார். இந்த சம்பவம் தொடர்பாக கோட்டூர்புரம் போலீஸார் வழக்கு பதிவு செய்து அங்குள்ள சிசிடிவி காட்சிகளை கைப்பற்றி விசாரணை நடத்தினர். விசாரணையில் ரௌடி சுக்கு காப்பி சுரேஷ்(25) என்பவர் தலைமையிலான டீமுக்கு தொடர்பு இருப்பது தெரியவந்தது.

இதுகுறித்து கோட்டூர்புரம் போலீஸார் கூறுகையில், `` கடந்த 2022-ம் ஆண்டு ரௌடி அருணின் காதலி சாயின்ஷா என்பவர் கேளம்பாக்கத்தில் கொலை செய்யப்பட்டார். இந்தக் கொலை வழக்கில் ரௌடி சுக்கு காபி சுரேஷ், அவரின் கூட்டாளிகள் கைது செய்யப்பட்டனர். காதலியின் கொலைக்கு ரௌடி சுக்கு காபி சுரேஷை பழிவாங்க அருண் காத்திருந்தார். இந்தத் தகவலை தெரிந்த சுக்கு காபி சுரேஷ், அருண், அவரின் சகோதரர் அர்ஜூனை தீர்த்துக்கட்ட முடிவு செய்தார்.

அதன்படி நேற்றிரவு அருணும் அவரின் சகோதரர் அர்ஜூன் ஆகியோர் மதுபோதையில் தூங்கிக் கொண்டிருப்பதாக சுக்கு காபி சுரேஷிக்கு தகவல் கிடைத்திருக்கிறது. அதனால் கூட்டாளிகளுடன் வந்து அருணைக் கொலை செய்திருக்கிறார். அர்ஜூன் என கருதி படப்பை சுரேஷை இந்தக்கும்பல் தீர்த்துக்கட்டிவிட்டது. இந்த இரட்டை கொலை வழக்கில் ரௌடி சுக்கு காபி சுரேஷ், அவரின் கூட்டாளிகளை பிடிக்க தனிப்படை அமைக்கப்பட்டுள்ளது.

கொலை செய்யப்பட்ட ரௌடி அருண்குமார் மீது சென்னையின் பல்வேறு காவல் நிலையங்களில் 7 வழக்கு உள்ளன. அதே போல ரௌடி படப்பை சுரேஷ் மீது சென்னை, திருவள்ளூர் காவல் நிலையங்களில் 10 க்கும் மேற்பட்ட வழக்குகளும், ரௌடி சுக்கு காப்பி சுரேஷ் மீது கொலை உள்பட 17 வழக்கு நிலுவையில் உள்ளன. இரண்டு ரௌடி கும்பல்களுக்கு நடந்த முன்விரோதம் காரணமாக இந்த இரட்டைக் கொலை நடந்திருக்கிறது" என்றனர்.

போலீஸ் அதிகாரி ஒருவர் கூறுகையில், ``இரட்டை கொலை வழக்கில் தேடப்படும் ரௌடி சுக்கு காபி சுரேஷ், கோட்டூர்புரம் பகுதியைச் சேர்ந்தவர். இவருக்கும் ரௌடி அருண்குமார் டீமுக்கும் இடையே அடிக்கடி மோதல் ஏற்பட்டு வந்தது. அதனால் அருண்குமாரின் காதலியை சுக்கு காபி சுரேஷ் டீம் கொலை செய்தது. சுக்கு காபி சுரேஷ் மீது சென்னையை தவிர வேலூர், கும்பகோணத்திலும் குற்ற வழக்குகள் உள்ளன. சுக்கு காபி சுரேஷ் கைதானால் மட்டுமே இரட்டை கொலைக்கான முழு விவரம் தெரியவரும்" என்றார்.

வேட்டை நாய்கள் - Gangs of தூத்துக்குடி -இப்போது விகடன் ப்ளேயில்..!

Link : Part 01 : https://tinyurl.com/Vettai-Naigal-Part-01 |

Part 02: https://tinyurl.com/Vettai-Naigal-Part-02 |

80களில் தூத்துக்குடியை மிரள வைத்த டான்களின் கதை வேட்டை நாய்கள் - Gangs of தூத்துக்குடி இப்போது Audio formatல் உங்கள் Vikatan Playல். இப்பவே Vikatan APPஐ Download செய்யுங்கள் Play Iconஐ Click பண்ணி வேட்டை நாய்கள் கேளுங்க | #Vikatan #VikatanPlay #AudioBooks